Shillong, Jylliew 13:
Kum ka jingpyrkhat lem na ka bynta ka bha ka miat jong ki nongshong shnong khamtam ki paidbah kiba ju leit ju wan da ki bos dieng ha sor bad khapsor, ka Shillong City Bus Syndicate (SCBS) ka la pynbna paidbah ba ka la shim ïa ka rai ban kham pynbun shuh shuh ki bos dieng kiba kamai sha thaiñ Tynring bad Mawpdang lyngba ka NEIGRIHMS Mawdiangdiang bad Mawkasiang khnang ba ki nongleit nongwan kin nym mad jingeh.
Haba ïakren bad u President ka Shillong City Bus Syndicate, u Bah Hopefulwell Buhphang ha ka sngi ba-ar, u la ïathuh ba ha ka 6 tarik mynta u Jylliew, ka jingïalang jong ki trai bos dieng ka la mynjur ban phah kham bun ki bos sha thaiñ Tynring shaduh Mawpdang bad bad ka bos banyngkong eh ka ban mih na ka jaka ïeng bos ha Them Ïew Mawlong ka dei ha ka por 8 duna mynstep.
U la ong ba hadien ba ka bos banyngkong ka la mih, yn bud sa kawei pat ka bos ka ban mih hadien 15 minit.
U Bah Phanbuh u la ong ba ka jingthmu ban phah kham bun ki bos sha katai ka thaiñ ka long ban ai ka jingshakri ïa ki paidbah nongleit nongwan kiba ju leit sha NEIGRIHMS bad Tynring naduh kiba leit shim dawai sha NEIGRIHMS, kiba leit trei namar ka thaiñ NEIGRIHMS ka la kham don bun tylli ki shlem treikam ka Sorkar, bad ki briew ruh ki la nang bun.
U Bah Phanbuh u la ong ruh ba ki khynnah pule ruh ki mad jingeh ban ïoh kali bad ki ud ruh ba rem ka bai kali, hynrei lada shong da ka bos ka bai kali ruh kan kham duna khyndiat, bad ki paidbah ruh kin kham myntoi haba phah kit jingkit da ka bos.
Nangta, u la ïathuh ba kin don kumba 10 tylli ne 12 tylli ki bos ki ban leit sha thaiñ Tynring man la ka sngi.
Katba u General Secretary ka Syndicate, Bah Pyntngen Mylliempdah, u la ong ba kumba la rai ban phah kham bun tylli ki bos sha thaiñ Tynring na ka bynta ka bha ka miat bad jingmyntoi lang jong ki paidbah nongleit nongwan. Kumta na ka liang ka Syndicate kan sdang phah noh kham bun ki bos naduh ka 19 tarik mynta u bnai.
U la ong ba ka Syndicate kan ïakren ruh bad ki nongkitkam shnong na ka bynta ban pynbeit ïa ki jaka ban pynhiar bad kyntiew ïa ki nongshong bos ha kaba yn phah ruh da ka shithi sha ki Rangbah Shnong ne Sordar Shnong jong kine ki shnong kiba ki bos kin hap ïaid lyngba.
U Bah Denis Warbah uba dei u dkhot ka Syndicate bad u nongñiah bos, u la ïathuh ba ki bos kiba kamai sha thaiñ Tynring ki ju mad jingeh ha lynti namar ym don jaka ban pynhiar bad kyntiew ïa ki nongshong bos kum ha thaiñ Nongmensong, NEIGRIHMS, Ishyrwat namar ki surok ki la khapngiah ba ki don ki kali kiba ju ïeng baroh arliang surok.
Kumta u la ong ba lada ka don ka jaka ban pynhiar bad kyntiew ïa ki briew, yn lait na ka dheng kali bad pynwit ïa kiwei ki kali kiba bud nadien.
Na ka liang u Bah Wanboklang Kharsati uba dei u dkhot ka Syndicate, u la pynpaw ba ki bos kiba kamai sha NEIGRIHMS bad Tynring bad kiba kamai sha Smit ki mad jingeh haba ki mih na ka jaka ïeng ha Them Ïew Mawlong namar ka jur palat ka dheng kali khamtam namarba ka Sorkar haduh mynta kam pat pyllait ban ïaid laitluid ki kali na Them Metor.
U la ong ba ki bos haba ki mih na jaka ïeng bos, ki hap ban leit swait kylleng kylleng bad ki sahkut ha ka dheng kali. Kumta u la kyrpad ïa ka Sorkar ban shah noh kloi ban ïaid ki bos lyngba ka jaka ha Them Metor kam pher wat lada ka Sorkar kam pat lah ban pynkynriah ïa kiba shong ba sah ha kane ka jaka.
