Shillong, Jylliew 13:
U MDC ka HSPDP na Mawkynrew konstitwensi, Bah Martle N Mukhim u la pynpaw ba um don jingtip eiei ba ki don ki nongkitkam ka HSPDP ba kin mih noh ban leit pynïasoh sha ka Voice of the People Party (VPP).
U Bah Martle u la ong ba um don jingtip eiei halor kita ki khubor ba ki nongïalam ka HSPDP kin mih noh namar haduh mynta u lap ba ka seng ka dang biang bha.
U la kyntait ruh ïa ka jingkynnoh ba ma u ruh un leit ban pynïasohlang noh sha ka seng VPP hadien ba u la leit ban ai jingkyrshan ïa u Bah Ardent mynba u dang shong shah thngan ha jaka ïeng kali hajan Additional Secretariat ban ïakhun pynbeit biang ïa ka bhah thung kam.
Shuh shuh u la ong ba haduh mynta ka seng ka dang long kawei, hynrei ïa ki ban sa wan um lah ban batai.
Kum ban shu pynkynmaw ka la mih ka khubor ha kine ki khyndiat sngi ba u President ka HSPDP Youth Wing, Bah Sandondor Ryntathiang u lah ban mih noh namar u thmu ban leit pynïasoh sha ka seng VPP kaba la ïalam da u Bah Ardent Basaïawmoit kum u President.
Ym tang u Bah Sandondor, hynrei kiwei kiwei ki nongkitkam kin mih noh namar ki don shibun ki daw hapoh ka HSPDP.
Kum ban shu pynkynmaw, ki don ar ngut ki MLA ka HSPDP kiba la synrop lang hapoh ka sorkar MDA-2 ba ïalam da ka NPP. U Bah Shakliar Warjri u la shah bynshet ban shimti nyngkong kum u Myntri ha katei ka sorkar.
