Shillong, Jylliew 13:
Ki nongñiah kali kamai ha ka Sngi Ba-ar ki la kren shai ba kim pdiang satia ïa ka hukum ba la pynmih da ka Deputy Commissioner ka East Khasi Hills, Kong R.M. Kurbah halor ka ‘Odd-Even’ ne ka jingïaid kali pud sngi.
“Ngi pyrshah ïa kaei ba ong ka DC mynnin ba dei ki taksi kamai ba wanrah ïa ka jingdheng kali. Ngim sngew ïahap ïa kane,” la ong u Organising Secretary ka East Khasi Hills Local Taxi Welfare Association (EKHLTWA), Bah Mangkara Shylla.
Haba ïathuh ba kam don satia ka jingdheng kali ha kane ka taïew ba la dep, u la ong ba ka jingpynmih hukum ka dei tang ban shu ñioñ beit ïa ki rit ki ria.
“Ngi kwah ban ong ruh ba dei ban peit bha mano ba wanrah ïa ka jingdheng kali…ki taksi kamai ne ki kali shimet ne ki kali ba wan nabar. Kiba kumno ki kali kiba wanrah jingdheng kali ïa ka sor,” la buh jingkylli u Bah Shylla.
Haba kylli, u la ong ba ki pulit kim shym la bat satia ïa ki taksi ha kane ka sngi namar lehse kim pat ïoh hukum na ka DC ban peit ïa ki ‘Odd-Even’.
“Nga tharai ki pulit ruh ki leh ïa kaba dei namar ki ïohi ba kam don ka jingdheng kali bad kin bat ha ka nongrim aïu. Lada ki bat te ngim banse ngin hap ban ïa pyrshah bad ïa pyni ba na kaei ka daw ba ki bat ïa ngi,” u la ong.
U la ong ruh ba katei ka bynta ka buh jingeh shi kat dei khamtam ïa kito kiba don ïa ka ram namar lada ym kamai yn siew da ei ban pyllait ïa ka EMI.
“Ngim bud bad ngim pdiang satia ïa ka hukum jong ka DC bad ngin kamai beit kumba ju kamai,” la ong utei u nongïalam ka EKHLTWA.
Ha kajuh ka por, u la ban biang ba ki bor ba dei khmih kin hap peit lang ïa ki kali shimet namar ban ong ba ka jingdheng kali ka dei tang ha Khyndai-Lad bad Motphran kam ïahap satia.
“Peit ha Ïew Mawlong, Laitumkhrah…hooid ha ïew ki bun ki taksi namar ki briew ki wan ban leit donkam na kane ka jaka kumjuh na Khyndai-Lad. Phi ong ban khang lad ïa ngi, ngin kamai sa naei,” la buh jingkylli u Bah Shylla.
Shuh shuh haba bynrap ba ka jingdheng kali kaba malu-mala ka dei tang ha ka por wai skul bad wai trei, u la ong ba ka jingdheng kali na Kashari-Khyndai-Lad ka long ha ka por kumba 3:30-4:00 baje janmiet.
Ka Deputy Commissioner ka East Khasi Hills, Kong R. M. Kurbah ha ka Lah Sngi U Blei ka la ong ba ka jingpyntreikam ïa ka hukum halor ka ‘Odd-Even’ ne ka jingïaid kali pud sngi kan sdang naduh ka Sngi Ba-ar.
