Khliehriat, Jylliew 13:
Ka MLA jong ka Sutnga-Saipung, Kong Santa Mary ka la pynpaw ka jingsngewkhia namarba ka East Jaiñtia Hills District ka dei kawei na ki district hapoh ka ri India kaba don bun ki briew kiba shah ktah ha u ’ñiangkulia.
Ka Kong Santa Mary Shylla ka la pynpaw ïa kane haba kren kum ka kongsan ha ka jingïalang jong ka prokram Integrated Health Campaign, Extended Outreach Camps kaba la long ha Community Hall ka Lad Rymbai Dongwah, East Jaiñtia Hills District ha ka sngi Ba-ar.
Ïa kane prokram la pynlong da ka Meghalaya AIDS Control Society ryngkat ka jingïatreilang bad bor pynïaid District ka East Jaiñtia Hills, ka shlem treikam District Medical & Health Officer (DMHO) bad kiwei ki tnat treikam sorkar ka East Jaiñtia Hills District.
Ka Kong Shylla ka la kyntu ïa ki nongshong shnong ba kim dei ban lehraiñ ban leit phah test namar kane ka jingpang lada ka neh hapoh ka met kan long ka jingpang bah kaba ktah ym tang ïalade shimet hynrei ïa ka ïing ka sem bad ka imlang sahlang.
Shwa kane, u Bah A Lanong, Deputy Director (Main Streaming) Meghalaya AIDS Control Society, Shillong u la ïathuh ba ïa kane ka jingïalap halor kane ka jingpang la buh thong ban pyndep hapoh lai bnai ka ban kut ha u Nailar 2023 bad kan leit sha ki 198 tylli ki shnong na ki 63 tylli ki Health Camp.
Nangta, u la ïathuh naduh ka 2 tarik Jylliew haduh mynta la dep ban pynlong 8 tylli ki Health Camp sha ki 40 tylli ki shnong jong ka East Jaiñtia Hills District. Kiba la wan shakhmat sha kine ki Health Camp ki long 1516 ngut bad kiba ngat thymmai ha utei u khñiang jingpang ki don 8 ngut.
Shuh shuh u la ïathuh haduh u Rymphang 2023, ki briew kiba im bad utei u khñiang HIV hapoh ka Jylla ki don 7000 tam kiba la dep ban pynrung kyrteng bad ka Society bad kiba shim ïa u dawai ART ki don kumba 4700 ngut.
U Deputy Commissioner ka East Jaintia Hills District u Abhilash Baranwal, IAS, u la ong, ka East Jaiñtia Hills District ka dei ka district kaba la kiew bha ha ka jingdon ïa u khñiang jingpang HIV. U la ong lada leh screening bad test ïa ki 100 ngut ki briew kumba 2.8% kin ïoh ïa u khñiang jingpang HIV.
Shuh shuh u la ong, katkum ka kaiphod ba la ïoh lum, ki don haduh 2500 ngut ki briew hapoh ka district kiba im lang bad une u khñiang jingpang HIV bad lada shim jingkheiñ bniah kin don palat ïa ka 4,000 ngut.
Kumta u la kyntu ïa ki nongshong shnong ban wan shakhmat ban phah test khnang ba kin lah ban ïada ïalade, ïa ka ïing ka sem bad ïa ka imlang ka sahlang.
Nalor kata, u la ban jur ruh ïa ki nongshong shnong ba kim dei ban tieng ban phah test namar ka jingtest ka long kaba jar-jar bad ka bym pynbna lada don ne lada ym don ïa uta u khñiang jingpang.
Ïa ka jingïalang la pynïaid da u Bah J Shylla, Additional Deputy Commissioner, East Jaiñtia Hills District ha ka jingdonlang u R. Brahma, EAC, ka Dr J.N. Shullai Director jong ka Mihmyntdu Community Social Welfare Association (MCSWA), u President Synjuk Waheh Shnong East Jaiñtia u H. Nongtdu bad kiwei kiwei.
Kum ka dak ka jingpynshlur ïa kiwei ban wan shakhmat ban test na ka liang u DC ka EJH District, u Abhilash Baranwal, u J. Shylla Additional Deputy Commissioner bad kiwei kiwei ki la phah tes ïalade.
Hadien kane ka jingïalang la pynlong ruh ïa ka Health Camp ha Lad Rymbai Dongwah Community Hall bad Lad Rymbai Datsympein Community Hall, Lad Rymbai B, Mooknor Community ha kaba ki paidbah kila wan ban phah test ïalade bad la pynrung kyrteng ruh ïa ki nongshong shnong ha ki MHIS bad Aadhaar ha kine ki camp.
