Shillong, Jylliew 13:
Ka Executive Committee jong ka Khasi Hills Autonomous District Council (KHADC) hapoh ka jingïalam u Bah Titos Chyne kum u Chief Executive Member (CEM) kan sa wanrah ïa ki ar tylli ki mat kiba kham kongsan ha ka Dorbar Mang Tyngka ka ban sdang naduh ka 19 tarik Jylliew, 2023.
U Bah Titos u la ïathuh ba ka EC ka la rai ban pynkhlaiñ ïa ka jingtreikam ha ka building bye-laws bad ban pyntreikam ïa ka Solid Waste Management ryngkat ki katto katne ki kyndon kiba hap ban pynkylla.
Ha kajuh ka por ka EC ka la mynjur ïa ki kyndon ha ka Acquisition of land ka KHADC kaba la ïoh jingmynjur na u Lat ka jylla halor ki kyndon ba la pynwandur da ka sub-committee hapoh ka jingïalam u Bah Lamphrang Blah kum u shongknor ka dorbar ka KHADC kaba la ai jingmut.
Ha kane ka jingpynwandur la mynjur ruh ban buh da ki computer haba buh bha ïa ki kot ki sla katkum ka juk kaba mynta.
Ha kajuh ka por ka EC ka la mynjur ban thaw noh la ka jong ka cell ha kane ka aiñ shna ïing namar haduh mynta ym don ki nongtrei kiba laitluid ki ban trei ïa kane ka kam na ka bynta ban ai jingbit ban shna ïing.
Nangta haba ïadei bad ka Solid Waste Management, ka Council kan pyntreikam noh khnang ban pyllait ïa ka jingbret pathar ha ki rud ki kiar ban lait na ka jingjaboh ki wahduid bad ka mariang.
Kane ka Dorbar Mang Tyngka jong ka KHADC kan bteng haduh lai sngi, kata naduh ka 19 haduh 21 tarik Jylliew.
Haduh mynta ïa ka EC ba la ïalam da u Bah Titos kum u CEM la ïatreilang da ka UDP, NPP bad HSPDP, katba ka seng Congress ka shong ha ka liang pyrshah.
