Shillong, Jylliew:
Ka Khasi Students’ Union (KSU) Saiden Unit ha ka Sngi Ba-ar ka la ujor sha ka tnat Khlaw & Mariang ka Jylla, pyrshah ïa ka jingshyrkhei jong ka jingkhlong shyiap be-aiñ napoh ka Wah Iewsier kaba hap hapoh ka Umtasor Bead Territorial Forest Department.
Ïa kane ka dorkhas ba la soi da u President bad Secretary ka KSU-Saiden, la leit buh hakhmat u Assistant Range Forest Officer, Territorial Forest Department (Umtasor Bead), Nongpoh Territorial Division haba dawa ba dei ban kheiñ be-aiñ bad kurup noh mardor ïa baroh ki kor khlong shyiap katkum ki kyndon aiñ.
Katkum ka jingujor ba la ai, ka KSU-Saiden ka pyntip ba ka la shem ïa kane ka jingkhlong shyiap ha Wah Iewsier ka dei kaba pynkheiñ ïa ka kyndon 2 jong ka MMDR Act, 1975 hapoh ka National Green Tribunal (NGT).
“Ngi la ïoh ïa ka jingtip ba ka jingkhlong shyiap be-aiñ ka la ïaid mynta ha Wah Umran ha Iewsier (thaiñ Umtasor) bad la khlong ïa u shyiap da ki kor,” la ong ka dorkhas. Ka pyntip ba ka seng ha ka 8 tarik Jylliew, ka la hiar jurip ïa kine ki jaka khlong shyiap ha Iewsier bad shem ba ki briew ki la pyndonkam da ka kor (machine) ban khlong ïa u shyiap napoh ka wah.
“Kane ka jingkhlong shyiap ka la pynjngut bad pynjaboh ïa ka wah, kaba la ktah pat ïa ki doh-um doh-wah kiba im ha ka bad kumjuh ruh ïa ki bynta jong ka wah kiba don sharum,” kala ong.
Namar kata, ka KSU ka la ong ba namar kane ka jingkhlong shyiap, ka la wanrah ruh ïa ka jingtwa bad jingshah rong noh ki jaka harud jong ka wah.
