Mairang, Jylliew 14:
Ka jingbym shimkhia jong ka tnat ba dei peit ban phah maramot ïa ka jingsniew jong ka surok bah National Highway 44E ha kawei na ki jaka kaba dang hap hapoh ka shnong Kynshi Bangla ha Eastern West Khasi Hills ka la wanrah jingthut ïa ka ïaid ka ïeng ki paidbah, bad lehse kane kan wanrah ruh ka jingma ïa ka ïaid ka ïeng jong babun balang.
U Sordar ka shnong Kynshi Bangla, Bah Aibanrikupar Syiemlieh u la ong ba katei ka surok ka la jot rathai la kumba lai snem eiei. Lyngba katei ka jingsniew ka surok ha katei ka jaka, ka ju wanrah ruh ïa ki jingjia tyngkhuh kali ha kaba bun ki kali kiba ïaid lyngba kane ka surok ki ju kiar ban ïaid na ka lynti kaba sniew bad bun hi ki kwah ban ïaid na ka liang kaba kham bha. Dei na kane ka daw ka wanrah ïa ki jingjia ïatyngkhuh kali ha katei ka jaka.
Shuh shuh u la ong ba na ka jingjur jong u slap bad ka dei ruh ka jaka kaba shong um, bad halor kane na ka liang ka shnong ka la dep ruh ban phah da ka jingthoh sha u EE, PWD ka National Highway. Katba na ka liang ka tnat ka la phah ban peit ïa kane ka jaka ha kaba ka la sdang ban pyntrei ban thep da ki maw ha kitei ki jaka kiba sniew bad ka la sdang ïa ka jingmaramot. Hynrei ha ka por ban sdang ban siang rong la ong ba na ka liang u kontraktor u khlem wan ban pyntrei bad kane ka surok haduh mynta ka la sahkut kumjuh bad ka la nang sniew shuh shuh.
Kumta u Bah Aibanrikupar u la kyntu ïa ka tnat ba dei peit ba wat la kam lah ban pyntrei ban siang rong, hynrei ka dei ban phah maramot malu-mala khnang ba ki nongñiah kali kin lait na ka jingmynsaw.
