Shillong, Jylliew 14:
U Pijush Hazarika uba dei u Myntri ka Sorkar Assam ha ka sngi Balang u la ong ba ka jingshah pyndik bad pynthut jong ki paid Khasi-Pnar ha khappud ka Ri-lum Jaiñtia bad Karbi-Anglong ka dei ha ka kynhun ki runar bad kine kim dei satia kiba na Jylla Assam.
Haba kren sha ki lad pathai khubor hadien ka jingïalang jong ka Regional Committee kaba la ïakynduh ha nongbah Shillong ha ka sngi Balang ban ïakren pynbeit pud, u Hazarika u la ong, “Ki kynhun runar kim dei satia ki jong ngi.”
U Pijush Hazarika u dei uba khlieh ïa ka Regional Committee ka West Karbi Anglong District, katba u Bah Sniawbhalang Dhar u dei uba khlieh ïa ka Regional Committee ka West Jaiñtia Hills District, kiba shong bishar ïa ki jaka ïakajia ha Block-I bad Psiar-Khanduli.
Kane ka jingkynthoh ka la mih halor ka jingïakulmar kaba mih dang shen hapdeng ki paid Karbi bad ki Khasi-Pnar ha Khanduli, West Jaiñtia Hills District.
Haba pynpaw ba ki briew na baroh artylli ki Jylla ha khappud ki don ïa ka jingïadei ba ïajan bha, u Hazarika u la ong, “Ngi dei kiba ïa long paralok bad ngim don eiei pyrshah ïa ki briew na Meghalaya. Ngi don ka jingïadei ba ïajan bha bad ka Meghalaya bad ngi burom bha ruh ïa ki briew na Meghalaya bad kumjuh ruh jong kiwei ki Jylla ka thaiñ shatei lam-mihngi ka Ri”.
Haba ban jur ïa ka jingdonkam ban pynbeit noh ïa ka jingïakajia pud hapdeng ka Meghalaya bad Assam, une u Myntri ka Assam u la ong, “Ngi don ïa ka jingïakajia pud ba la sahteng la slem bha, hynrei nga tikna ba ngin sa lah ban ïapynbeit noh da ka jingïasngewthuh jingmut lang ha kine ki khyndiat por ban sa wan”.
Haba kylli, u Hazarika u la ong, “Ki runar ki dei hi ki runar. Kumno phin pynithuh ïa ki hynrei nga ong ha phi ba ki paid ka Assam ki ieid ïa ki paid Meghalaya bad nga ngeit ruh ba ki paid Meghalaya ki don ïa kajuh ka jingieid ïa ki paid ka Assam”.
