Shillong, Jylliew 14:
Ka sorkar jylla ka la kam ba ka la shim ïa ki katto-katne ki sienjam pyrshah ïa ki pulit kiba la donkti ha ka jingsiat ïap ïa u General Secretary barim ka Hynñiewtrep National Liberation Council (HNLC), u Bah Cherishstarfield Thangkhiew.
Hynrei na ka liang ki bahaïing hasem u Bah Che kiba la mudui da ka mukotduma ha Meghalaya High Court, ki la pynpaw ba hadien ba ki la ai da ka FIR halor ka jingjia ïa u Bah Che, bad hadien ba la ïoh ïa ka kaiphod jong ka jingtohkit da u Nongbishar ba la shongthait, ki khlem ïoh jingtip eiei shuh kaei kaba la jia.
Ïa ka mukotduma pyrshah ïa ka sorkar jylla bad kiwei la ai da u Bah Granary S. Thangkhiew uba dei u para trai jong u Bah Che.
Ha kane ka mukotduma, la pyni ba hadien ba la ai ïa ka FIR ha ka 18.08.2021 bad ïa ka ‘case’ la pynrung ha thanat Mawlai (Case No. 44 jong u snem 2021), bad hadien ba la ïoh ïa ka kaiphod jong ka jingtohkit da u nongbishar ba la shongthait (One Man Enquiry Commission) ha ka 19.05.2022, ka ïing ka sem jong u Bah Che kam don jingtip shuh kaei kaba la jia.
Na ka liang u muktiar ka sorkar u la pynpaw ba ka sorkar ka la shim ïa ki katto katne ki sienjam ha kaba ïadei bad ka jingtohkit bad ka la shim ruh ïa ki sienjam pyrshah ïa kito ki pulit kiba la donkti ha ka jingsiat ïap u Bah Che. Une u muktiar u la pan por na ka High Court ba un ai da ka kaiphod kaba janai bad ban wanrah ïa ki kot ki sla ha kaba ïadei bad kane ka mukotduma.
Kumta ka High Court ka la ailad saw taïew ïa utei u muktiar ba un ai da ka kaiphod bad ban wanrah ïa ki kot ki sla, bad ka jingbishar kan sa long biang ha ka 13 tarik Naitung, 2023.
