Shillong, Jylliew 14:
Ka Hynñiewtrep Youths’ Council (HYC) Mawlai Circle lyngba ka kyrwoh ba la phah da u Publicity Secretary ka HYC Mawlai Circle, Bah Donboklang Khriam u la pyntip ba ha ka Sngi Balang hapoh ka jingïalam ka Organising Committee ka la leit ban jurip kyndit-kynsan bad pynher krad da ka SLO ïa ki katto katne ki bar jylla kiba la wan trei bad wan shong dukan beaiñ hapoh ka ka shnong Mawlai.
Ïa katei ka ‘Operation’ la sdang na Mawlai Mawdatbaki Nongmali-3 bad ter ter shaduh sha Mawiong Umjapung.
Hadien ba la lap ïa ka jingwan trei ba beaiñ jong kitei ki bar jylla, na ka liang jong ka seng ka la shu beh bad phah khang mardor ïa kitei ki dukan, kiba kynthup ïa ki nongtrei bylla misteri, nongshong dukan khapshñiuh bad dukan hardware.
Haba ïakren bad u Organising Secretary jong ka jylli, u Bah Shanbor Marweiñ u la kynnoh ba ki bar jylla mynta ki la kheiñ shngaiñ ban wan sha Mawlai bad kane baroh ka dei na ki Khasi hi.
U Bah Marweiñ u la maham da kaba tyngeh bad ong ïa ki trai ri ba ki dei ban husiar ba ïoh ba ka kylla long kum ka khana ba ynda la syaid u bseiñ un sa puh kylla ïa ki hi.
U la ong haba jurip ïa kitei ki kam ba ki bar kylla ki trei, la lap ba ki dei ki kam kiba ki Khasi baroh ki lah ban trei. Kumta ka la pynlong ïa u ba un buh jingkylli ba balei kim khot ban trei da ki Khasi lajong.
U Bah Marweiñ u la ong ruh ba ka seng nangne shakhmat kan nang pynjur ban khynra bar jylla khamtam ïa kito kiba trei beaiñ khlem kot khlem sla hapoh Mawlai lyngba ka SLO.
