Shillong, Jylliew 14:
U MLA ka Nongkrem konstitwensi bad uba dei ruh u President ka Voice of the People Party (VPP), Bah Ardent Basaïawmoit, u la ong ba ki paidbah ka Sohïong konstitwensi ki dei kiba ieid jaidbynriew shisha namar ki la kyntait ïa ka seng NPP kaba la synshar donbor ha kine ki san snem.
Ïa kine ki kyntien u Bah Ardent u la kren ha ka jingïalang pynrung dkhot ka VPP ha Sohïong kaba la long mynta ka sngi Balang ha ka jingïadonlang u MLA ka VPP na Mawlai, Bah Brightstarwell Marbañiang bad ki paidbah kiba la poi palat hajar ngut.
Wat la u slap u la ther ha ka por mynstep, hynrei u la sangeh haduh ka 12 baje shiteng sngi bad ki paidbah ki la poi ban sngap ïa ka jingpynshai u Bah Ardent halor ka nongrim jong ka VPP.
Haba ai jingkren ha kane ka jingïalang u Bah Ardent u la ong ba ha kane ka ilekshon ba dang shu dep ki paidbah ki la wad ïa ka shap u prah, hynrei ki paidbah ka Sohïong konstitwensi kim kwah ban jied ïa ka seng NPP namar ka seng kaba synshar donbor ha kine ki san snem hynrei ki la jied ïa kawei pat ka seng riewlum.
“Ka jingjop kawei ka seng riewlum kam dei ba ki paidbah ki ieid ïa kata ka seng, hynrei namar ki dei kiba ieid jaidbynriew kim kwah ban pynjop ïa ka NPP” u la ong.
U la ong ba hadien ba ka sorkar ka la dep pynwandur ïa ka Expert Committee ban peit bniah ïa ka bhah thungkam thungkam, ka seng kan sa sdang ka jingïakhih sa ïa ka jingthung Chairman, Vice-Chairman bad nongaibuit ha ki tnat bapher bapher jong ka sorkar jylla namar kane ka dei ka kam pynlut kai ïa ka pisa paidbah.
U Bah Ardent u la ong ba kumno u MLA uba la rem ilekshon un wan biang da ka kali ML-01 ha konstitwensi, u ïoh bïang ki PSO bad ka tulop kaba heh. Hynrei ïa ki MLA kiba jop um da kwah ban tuklar namar ki don ka hok naba ki la jop haba ki don ha ka sorkar.
Nangta, u la ong ban siew tulop ïa ki nonghikai, ban siew tulop ïa ki nongtrei kiba rit ka sorkar kam don pisa, hynrei ïa kine ki MLA kiba la rem ilekshon ka siew tulop da ki lak ha ka shi bnai.
Nalor kata, u la ong ruh ba kane ka sorkar ka shu buh tang ka jingkhang kam don ka jinghikai namar ïa baroh ki marpoh khyndew la shu khang, hynrei ym shym la don ka jinghikai namar lada la hikai lada kim kohnguh hap ban pynshitom.
Shuh shuh u la ong ki pulit ki leh bym ïohi lada ïaid ki trok high level, katba ïa ki kali kiba rit kiba ria ki lap thik thik.
Ha kane ka sngi la ïoh ruh ka jingkren na u MLA ka Mawlai, Bah Brightstarwell Marbañiang.
La ïohi ruh ba ki nongkyrshan ka UDP, NPP bad Congress ki la wan ban hiar sha madan ban rung dkhot sha ka VPP wat hapdeng ka jingktieh jong ka madan.
