Shillong, Jylliew 14:
Ka Meghalaya State Commission for Women (MSCW) ka la pynpaw ïa ka jingkyndit halor ki khubor ba ïadei bad ka jingshah weng ka Chairperson ka Commission, Kong Phidalia Toi.
“Ka MSCW ha ka 13 tarik Jylliew ka la pynlong ïa ka jingïalang ba kyrkieh ha ophis treikam ha kaba baroh ki dkhot kiba la ïashim bynta ki la pynpaw ïa ka jingkyndit halor ka khubor kaba pynbna ïa ka jingshah weng ka Chairperson da u Myntri ka tnad Social Welfare, Bah Paul Lyngdoh,” la ong ka kyrwoh na ka MSCW.
Ka kyrwoh ka ong ruh ba katei ka jingpynbna ban weng ïa ka Chairperson ha ka jingïakynduh bad ki nongthoh khubor ka long kaba la leh shaba palat bad kaba pynkheiñ ruh ïa ki kyndon jong ka aiñ – ‘The Meghalaya State Commission for Women Act’, 2005.
Haba kdew ba u Myntri u la ïoh pdiang ïa ka jingtip ba bakla ba ka Chairperson ka la pep ïa 3 na 4 tylli ki jingïalang jong ka Commission, ka kyrwoh ka la ong ba ha ka jingshisha, baroh ki jingïalang jong ka MSCW la pynïaid da ka Chairperson bad ki jinglum jingtip jong ki jingïalang lem bad baroh ki jinglum thup haba ïadei bad kitei, la buh bha ha ophis treikam jong ka Commission.
Ka MSCW ka la kdew ruh ba ka Chapter II Section 4 (3) jong ka Meghalaya State Commission for Women Act 2005 ka ong “….yn ym don mano-mano ban shah weng hapoh kane ka kyndon tat haduh ban da ïoh ka lad ban pynshai halor kata ka kam.”
“Kum ban shu kdew hangne, ka Chairperson ka la ïoh jingtip halor ka jingshah weng jong ka lyngba ki lad pathai khubor ba la saphriang ha ki rynsan lad pathai. Ym shym la pan jingpynshai na ka halor ki jingkynnoh pyrshah ïa ka ne ka lad ban pynsngew kumba la kdew da ka aiñ,” la ong ka kyrwoh na ka Commission.
Ka kyrwoh ka la pynsngew ruh ba ka long kaba donkam ïa u Myntri ban peit bniah ïa ki jingtip kiba don bad ka ophis ka Commission ha shuwa ban pynbna paidbah ïa kiei-kiei ki bym dei, ha kawei ka liang kaba buh jingkylli ïa ka Chairperson bad ka ophis kumjuh.
“Kaei kaba pynsngewsih ïa ka Commission ka dei ba ka Chairperson, Vice-Chairperson bad dkhot jong ka Commission ki la phah shithi arsien sha u Myntri ha ka 20 tarik Ïaïong, 2023 bad 29 tarik Jymmang, 2023 ban kyrpad ïakynduh ïa u ban ïakren ïa ki kam ba ïadei bad ka ophis. Hynrei ka ophis jong u Myntri kam shym la pdiang ïa ka jingkyrpad na bynta ka jingïalang,” la ong ka kyrwoh.
Shuh shuh ka la bynrap ba ka ophis jong ka Commission, kaba long ka tnad treikam ba donkam ban khmih ïa ki mat halor ki hok jong ki kynthei bad ban kyntiew ïa ka imlang-sahlang, kumba la pynpaw hi da u Myntri, ka kyndit ba la shu weng kam ïa ki kynthei ha ka rukom ka bym ïahap khlem da kheiñ shuh ïa ka kyndon jong ka aiñ.
“Lada kane ka dei ka jingeh jong ka Chairperson kaba dei ka kynthei, ngim lah ban mutdur kumno ki kynthei ba trei shitom jong ka Jylla ki mad man ka sngi. Namar kane, bad kiwei kiba bun ki jingnoh shiliang ba ki kynthei ki ïakynduh, ka jinglong-jingman ka tnad treikam ki kynthei jong ngi ka long kaba duna ha ka jylla bad ka ri baroh kawei,” la pynkut ka kyrwoh.
