Nongstoiñ, Jylliew 14:
Ha ka sngi Balang ka 14 tarik, kawei na ki shnong ha West Khasi Hills kaba la mad ïa ka apot jong ka jingshah kren namar ka jingkynnoh shah leh be-ijot jong palat 22 ngut ki khynnah rit, ka la pynlong da ka jingïaid paidbah ne ka rally ban pynrem ïa u briew ba la leh ïa kane ka kam.
Ha katei ka rally nalor ki longkmie longkpa, la ïa shimbynta ruh da ki samla kynthei bad shynrang, ki dkhot na ka HYC, KSU, VDP ka shnong bad ki khynnah skul na ki san tylli ki skul bad kiwei kiwei ha ryngkat ki placard ïa kaba la thoh ïa bun ki jingthoh pynrem ïa utei u briew uba la suba ba u la donkti ban leh ïa katei ka kam kaba la pynsuhjer ïa katei ka shnong bad ruh ïa ka imlang ka sahlang.
Ha katei ka sngi hadien ka rally, katei ka shnong ha ryngkat ka jingïatreilang bad ka North East Network, Meghalaya ka la ïoh ruh ban pynlong ïa ka jingïalang ai jingpynshai halor ka jingshah thombor ïa ki khynnah. Ka Kong Phida Uriah na ka North East Network, u Bah W Shabong DCPO ka WKH, ka Kong DP Nongbri WPSI na Nongstoiñ PS ki la shim ïa ka bynta ban ai ka jingkren pynshai ha katei ka jingïalang bad kiwei kiwei de.
U Bah W Shabong kum u District Child Protection Officer ka West Khasi Hills haba kren ha ka jingïalang ai jingpynshai, u la ong ba ka dei ban don ka jingïatrei lang hapdeng jong ngi baroh lang ban lait na ki jingshah thombor ïa ki khynnah.
U la ong ruh ba ka long ka jingpynsngewsih ba katei ka jingjia ka jia ha ki shnong ki thaw, hynrei ha kawei pat ngi ïaroh ïa kito ki khynnah kiba wan shakhmat ban wan ïathuh ïa kaei kaba la jia.
Shuh shuh u la ong ba ka long ka jingpynkyndit bynriew ïa baroh ba kane ka pyrthei kam dei shuh ban shaniah kulmar ïa ki briew hap ban long phikir namar bun sien ngi ïohi ba kine ki jingjia, u nongleh hi barabor u dei u briew uba ithuh bad ha kane ka rukom hi ki lah ban pynbiej ïa ki khynnah namar ki don kata ka jingshaniah.
U la ïathuh ruh ba katei ka jingjia hi kan ngat ha ka aiñ POCSO bad na ka liang jong ka ophis bad ka tnat pulit lem bad kiwei kiwei ki tnat treikam ka sorkar kin trei shitom katba lah bad ka dei ka kamram jong ki ban ai ka jingkyrshan ïa ki khynnah ha kajuh kin pyrshang kumno, ba kine ki khynnah kin ïoh ïa ka jingïarap bad kumjuh hap ban pyntikna ba kum kine ki jia jia kim dei ban jia shuh ha shnong ha thaw bad ym tang ha katei ka shnong hynrei ha kino kino ki shnong.
Na ka liang ka Kong DP Nongbri na ka Women Police Nongstoiñ ka la pynpaw da kaba ong, “Ba kum kine ki jingjia hi ym dei ban ong ba nga kynnoh ïa ki nonghikai, ïa ka shnong ka thaw lane ïano ïano. Hynrei ha nga hi shimet, nga lap ba kaba nyngkong eh ka dei ka jingbakla hi na la rympei ïing ki jong ngi ban saiñdur ïa la ki jong ki khun ki kti ha kaba kiba bun mynta ki kmie ki kpa kim don por ban hikai ïa la ki jong ki khun ki kti.”
Lah ban kdew hangne ba utei u briew uba la shah kynnoh leh ïa katei ka kam pohjait u dei uba la tip kyrteng u Mebanrilang Syiem Shangoi. Katei ka jingjia ka la jia naduh u snem 2022, hynrei ka la paw pen ryngkew hadien ba kawei ka longkmie ha ka 29 tarik u Jymmang 2023 ka la leit ban ujor sha ki pulit hadien ba u khun jong ka u la ïathuh ïa kawei kaba jia ïa u. Kumta hadien katto katne por ki pulit ki la kem noh ïa utei u briew.
