Shillong, Jylliew 14:
U nongmudui mukotduma pyrshah ïa ka sorkar jylla, ka Meghalaya Energy Corporation Limited (MeECL), ha ka Sngi Balang u la buh jingkylli ba kam don satia ka nongrim kaba sngewïahap ban pyni ba balei ki don ki jaka kiba hap ban mad kham bun kynta ka jingshah pynlip bording ban ïa kiwei pat ha Meghalaya ha kine ki sngi.
Na ka liang u nongmudui, u la pynpaw ruh ïa ka jingsngewkhia ba wat ki jaka sumar kum ki hospital sorkar ki khlem shah pyllait satia na ka jingpynlip bording.
Ha ka sngi ba la bishar biang ïa kane ka mukotduma mynta ka sngi, na ka liang ka sorkar jylla ka la kdew ba namar ka jinghap slap ha kine ki sngi, ka um ha Umïam ka la kiew da kumba 10 phut eiei bad namarkata, la lah ban tan bording kham bun.
Ha kajuh ka por, la pyntip ba ka jylla ka la thied bording na ka National Thermal Power Corporation naduh ba sdang jong u bnai ba mynta. Ka jylla ka dang peit ruh sa ban thied bording na ka ‘Open Grid’ ban pynkhlaiñ ïa ka jingsam bording.
Ha kaba ïadei bad ka bording sha ki hospital bad kiwei ki shlem bakongsan, ka sorkar ka la kdew ba kiba bun na ki hospital ki lait na ka jingshah pynlip bording hynrei kita ki hospital ki hap pat ban pynïasoh bad kita ki ‘High Tension Feeder Line’. Ka paw ba ka Civil Hospital ha Shillong kam don satia ïa uta u ‘High Tension Feeder Line’ ban pyndap bording ïa baroh kawei ka hospital.
Shuh shuh ka sorkar ka la ong ba la pyllait ïa ka North Eastern Indira Gandhi Regional Institute of Health and Medical Sciences na ka jingshah pynlip bording.
“Nalor ba ki hospital bad kiwei pat ki jaka sumar ki donkam ïa ka jingpynbit pynbiang ha kiba bun ki liang, kaei ka bakongsan tam pat ka long ba kim dei ban duh bording namar ka bording ka donkam ban pynïaid ïa ki kor ki bor na ka bynta ki nongpang kiba shitom jur bad kiba donkam Oxygen bad kiwei,” la ong ka High Court.
Kumta ka High Court ka la kyntu ïa ka sorkar ba kan shim ïa ki sienjam ba donkam ban pyntikna ba wat lada hap ban pynlip bording na ka daw ka jingduna, ïa ki hospital bad kiwei ki jaka sumar dei ban pyllait lane dei ban buh da ki Diesel Generator ha ki hospital khnang ba ka jingtreikam kan ym thut.
Ka la pynpaw ïa ka jingkyrmen ba na ka jinghap slap ha kine ki sngi, ka jinglong jingman ha ka liang ka jingsam bording kan kham biang. Hynrei ka High Court ka la ong ba donkam ïa ka ‘Plan B’ lane ka saiñdur kaba ar kaba dei ban long kaba don nongrim bad kaba peit lang ïa ki jingdonkam jong baroh lada ka don ka jingpynlip bording.
Ka sorkar jylla kan hap ban ai ïa ka kaiphod halor ka jinglong jingman ka jingsam bording bad ka jingbishar kan long biang ha ka 5 tarik Naitung, 2023.
