Jowai, Jylliew:
Ka shlem treikam jong ka District Mission Coordinator, SSA-SEMAM, West Jaiñtia Hills hadien ka jingwan ïuh-kjat ki briew jong ka 93.5 Red FM Shillong ha ka 13 tarik Jylliew pat ka la pynlong biang sa ïa kawei ka prokram ha ka jingïadei bad ka Jan Bhagidari Events and Activities kiba kynthup ïa ka Bicycle Rally, ka Story Telling bad ka Exhibition on Teaching Learning Material.
Ïa kane ka Bicycle Rally la sdang na Compound ka Kiang Nangbah Govt. College bad pynkut pat ha madan Chilliangraij bad ha kane ka prokram la wan ban ïashim bynta da ki khynnah skul ryngkat ka jingdonlang ki dkhot ka West Jaiñtia Hills District Bicycle Association. Ka Kong M Lakiang, DMC-SSA, West Jaiñtia Hills ka la lamkhmat ban pule ïa ka NIPUN Bharat Pledge.
Shuh shuh ha kane ka sngi la don ruh ka Story Telling ne ka jingïathuh khana ïa ki heprit ba pule ha ki Pre-Primary ïa kaba la ïathuh da ka Sam-i-naki Passah bad ruh ka Exhibition on Teaching Learning Material ba la shim bynta da ka HK Singh Memorial School, Jowai, St. Michael English School, Loompyrdi Iongpiah UPS SSA, Jowai RMSA School, Khimusniang Upper Primary School, Chutwakhu UPS SSA, Kurimai Memorial UPS SSA, Police Public School bad ki Model ne ki jingshna ba la wanrah da ki skul ki long beit kyrpang ha kaba ïadei bad ka mariang katkum ba la pruid dak hapoh ka G-20 Agenda.
Ïa kane ka prokram la wan ba sakhi lang ruh da u Bah S Blah, Sr. Lecturer DIET, Thadlaskeiñ kum u kongsan ryngkat ka jingdonlang ka Kong AP. Syiem, DSEO-West Jaiñtia Hills, ki Jt. DMC-SSA West Jaintia Hills bad ki Block Mission Coordinator, SSA ba kynthup ia Ka Amlarem, Laskeiñ bad Thadlaskein Block.
Khatduh la pynkut ïa kane ka prokram da ka jingsam ïa ki khusnam sha ki skul ba jop ha ka Exhibition on Teaching Learning Material kiba kynthup ïa ka HK Singh Memorial School, Jowai, St. Michael English School bad ka Loompyrdi Ïongpiah UPS SSA.
