Khliehriat, Jylliew 14:
Hadien ka jingther u slap, ka jingtwa khyndew ka la jia biang ha ka step sngi Balang ha ka surok ba don marjan bad ka Tunnel Sonapur, East Jaiñtia Hills.
Kane ka jingtwa khyndew kaba la tap ïa ka surok, ka la wanrah ïa ka jingdheng kali ha ka surok National Highway-6 tat haduh ban da dep pynkhuid lut ïa ka khyndew da ki bor khmih.
Ki pulit ka Lumshnong ha ryngkat ki pulit na Umkiang ki la kyntu ïa ki nongñiah kali ba kin phikir bha haba ïaid lyngba ka National Highway-6 namar ka jingma na ka jingtwa khyndew.
Ha kawei pat ka liang u Chairman jong ka District Disaster Management Authority uba long ruh u Deputy Comomissioner ka East Jaiñtia Hills u la pynmih da ka jingbthah paidbah ne ka public advisory ha kane ka aiom slap.
U la ong ha kane ka aïom slap, ka jingtwa khyndew kaba jia biang ha Sonapyrdi Tunnel ha surok National Highway 6 bad ka jingtwa khyndew kaba lah ban jia ha ka surok bah NH 6 na Lumshnong sha Malidor, kala ktah shikatdei eh ïa ka ïaid ka ïeng ki kali ha kane ka bynta jong ka surok.
Kumta u DC haba kyntu ïa ki paidbah u la ong ba ki dei ban kiar ïa ka ïaid ka ïeng lada ym donkam ha ki bynta ka surok, hynrei lada jia bym lah ban kiar ban ïaid lyngba kane ka surok dei ban pynthikna ban rah ïa ki bam ki dih, ka um namar ba ym lah ban tip ka jingtwa khyndew ne ka jingsahkut surok kali ban jia ha kano kano ka por.
Ka jingtwa khyndew ha tunnel Sonapur ka dei kaba la jia khah khah bad ka la pynthut bha ïa ka ïaid ka ïeng ki kali.
