Shillong, Jylliew 14:
Ki karikor (engineer) ka Meghalaya Energy Corporation Ltd (MeECL) hapoh ka shatri Coordination Committee of Registered MeECL Employees Associations and Unions (CCoRMAU) ka la ïatai bad u Myntri ka tnat bording u AT Mondal halor kiba bun ki jingeh kynthup ka jingkyrduh bording ilektrik bad ka jingthied bording bad jingdie bording sha ki karkhana ha kane ka Jylla.
Haba kren sha ki lad pathai khubor hadien ka jingïakynduh bad u Mondal mynta ka sngi ka 14 tarik Jylliew, 2023, u Vice President ka Coordination Committee of Registered MeECL Employees Associations and Unions, u Bah Arju Dkhar u la ong ba la ïakren shibun ki mat bad u Myntri naduh ka jinglong jingman ka bording ha Jylla, ka dor jong ka bording, ka jingthied bording, bad ka jingbuh dor jong ka State Electricity Regulatory Commission (SERC).
U Bah Arju u la ong ba ka long kaba donkam ban ïoh ka jingïatreilang jong baroh naduh nalor haduh ki nongtrei kiba rit duh khnang ban pynbha ïa ka jingtreikam bad ka jingai jingshakri.
Halor ka jingthied bording ilektrik, u Bah Arju u la kdew ba lada thied bording ha ka dor kaba heh kumno yn shu die pat ha ka dor kaba rit kaba ka dei tang 4 ne 5 tyngka, hynrei la thied bording pat ha ka dor 8 tyngka. “Hato ka sorkar ka lah mo ban ai dor lang lut kumjuh ïa baroh ki nongpyndonkam bording ilektrik naduh ki ’riew paidbah bad ki karkhana, bad hato kane ka long kaba dei ban leh?” u la buh jingkylli.
U la ong ba ka jingdie bording ka dei ban kham jem bad ha ka dor kaba long kum ka jingïarap (subsidised rate) ïa ki paidbah, hynrei ym lah ban shu ïarap lang ïa ki karkhana ruh. U la buh jingkylli haduh katno ki jingmyntoi la ïoh da ki briew ka Jylla na kine ki karkhana kiba la ïoh jingmyntoi bha lyngba ka jingai bording ïa ki ha ka dor ba kham jem kum ka jingïarap ïa ki.
“Ïa ki ïing ki sem kiba pyndonkam ïa ka bording, ka Sorkar ka dei ban ïarap kyrshan da kaba kham pynduna ïa ka dor, ym ïa ki karkhana ba heh ne ki shnat treikam kiba heh. Dei ban wad bniah ha kaba ïadei bad ki jingmyntoi ba kine ki karkhana ba heh ki la wanrah ïa ka jylla naduh ki snem 1990 ba ki la wan poi. Ka la don ka pisa kaba da ki klur tyngka bad na ka liang ka seng ka la kyntu ïa u Myntri ba dei peit ba un pynshitom ïa kine ki karkhana bad ruh ba kin siew ïa ki nongtrei jong ka tnat MeECL. Ïa kine dei ban leh katkum ki kyndon jong ka aiñ,” la ong u Bah Arju.
Ha kawei pat ka liang, u Bah Arju u la ïathuh ba la ïakren ruh bad u Myntri ka tnat bording halor ka jingeh jong ki nongtrei ka MeECL kiba khlem ïoh tulop la katto katne bnai mynta bad ïa ka ‘terminal benefit’ la shu ai teng da kaba pynlut na ka pisa kaba ïoh lum kum ka jingmih na ka bynta MeECL.
Une Vice President ka CCoRMAU, u la ïathuh ruh kum ki nongtrei ka MeECL, ka kynhun ka la kwah ban ïakynduh ïa u CMD ka MeECL, u Sanjay Goyal, hynrei ym tip na kano ka daw u la kiar ban ïakynduh ha ka khyllipmat kaba khatduh wat haba u la buh sngi ban ïakynduh ha ka 14 tarik Jylliew. U la ong ba ka long kaei kaei kaba sngewdiaw ba u ophisar ba heh duh ka MeECL um shym la kloi ban ïakynduh bad ka seng.
Kumta u la ong ba da ka jingdon ka mon na ka liang u Myntri Rangbah bad u Myntri ka tnat bording, kyrmen skhem ba yn sa lah ban pynbeit ïa ki jingeh kiba don ha MeECL.
Nalor kata, u la ong ba ka seng kan weng shwa shipor ïa ka jingïakhih bad yn ai ka jingkyrshan ha ryngkat ka jingkyntu ïa u Myntri ba dei peit ban shim lang ïa ka seng jong ki nongtrei ka MeECL hapoh ka kynhun jong ka jingïakren haba ïadei bad kiwei pat ki mat namar ym baroh ki mat ki long kiba lah ban ïakren bad ka seng, khnang ba ka shlem treikam kan lah ban nang kiew shaphrang.
