Shillong, Jylliew 14:
U Myntri Rangbah ka Jylla, Conrad K Sangma ha ka Sngi Balang u la phah da ka shithi sha u Myntri ka Sorkar Kmie ban kyrpad ba un tuklar mardor halor ka jingeh ba mad da ki samla pule ka Jylla Meghalaya namar ka jinghap leit thoh eksam CUET shabar ka Jylla hapdeng ka jingpyntip kaba khim bha jong ka por.
Ha kane ka shithi kaba u Myntri Rangbah ka Jylla u la phah sha u Myntri ka Ministry of Education, Skill Development & Entrepreneurship u Dharmendra Pradhan, u la kyrpad ba un bthah ïa ka National Testing Authority (NTA) ba kan pynbeit kyrkieh ïa kane ka kam.
“Nga kwah ban pyntip sha phi ba ka Sorkar Jylla ka la ïoh pdiang ïa bun ki jingujor na ki samla pule ka Jylla Meghalaya halor ka jingpynngat thoh eksam CUET shabar ka Jylla kum sha Ranchi, Jharkhand, Jorhat, Dibrugarh, Kolkata bad kiwei ki Jylla ba Shathie ka Ri,” la ong u Conrad ha ka shithi ba la phah sha u Myntri.
Shuh shuh u la pyntip ruh ha u Myntri ba ki Admit Card jong ki samla ki dang poi sha ki samla pule ka Jylla ha ka step 14 tarik Jylliew ba kin ïaleh ïa ka eksam CUET ha ka 16 tarik Jylliew 2023. Nangta ka por ba la ai ka la khim palat ïa ki samla pule ba kin pynkhreh ïa ki tum ki tam bad ban leit sha kitei ki jaka thoh eksam nalor ban wad jaka sah ha kine ki Jylla.
U Myntri Rangbah u la pyntip ba kane ka jingpynbeit ka NTA ka la buh ïa ki samla pule bad ki kmie ki kpa ha ka jingbym sngew ïahap bad sngew kutlad. Ka la wanrah ruh ïa shibun ki jingeh ban pynbeit ïa ka leit ka wan, ka jaka sah jong ki samla pule kiba la pynkhreh ïalade ban ïaleh ïa ka eksam CUET halor ka jingpyrkhat ba kin ngat thoh eksam ha ki jaka kiba jan.
U Conrad u la ong ba kum kane ka jingpynbeit jong ka NTA ka la pynduhlad ïa ki samla pule ka Jylla Meghalaya ba kin ïoh ïa ka kabu ba kin leit bteng ïa ki jingpule ha ki Central University kiba don ha kylleng ki Jylla ka Ri.
U la pynkynmaw ba ka Jylla ka la dep kyrpad teng ïa ka NTA ban buh ïa ki CUET centre ha baroh ki 12 tylli ki District ka Jylla Meghalaya ki ban long ha ki jaka pule kiba don lut ïa ki jingdonkam baroh ha ka ban lah pynlong ïa ka eksam CUET.
