Mawkyrwat, Jylliew 14:
Ka jingther palat jong u ’lap bah ’lap san ha ka miet sngi Ba-ar ha South West Khasi Hills District ka la pynlong ïa ki surok bad ki lynti ki syngkien lem bad ki ïing briew ba kin twa ha kylleng ki jaka khamtam ha Ranikor Block.
Katkum ki tyllong khubor ba la ïohlum la ïathuh ba hynne ka miet jong ka 14 tarik u Jylliew 2023 ha ka shnong Lower Mawpud, Ranikor Block ka la don kawei ka jingjia ha kaba ka ïing shet ja bad ka kynroh jong ka Kong Jopcy Wanniang ka la twa bad leit ban ïa ka ïing skul jong ka Khlur Rit Govt. LP School.
Nangta ki tyllong khubor ki la ïathuh ba kane ka dei ka sien ba-ar ba kane ka skul ka la mad ïa ka jingshah pynjot ha ki bor mariang hadien u snem 2019 ha kaba kajuh ka kynroh ïing jong ka Kong Jopcy ka la twa bad pynjot ïa katei ka skul.
Na ka liang u Headmaster haba ïakren bad u nongthoh khubor u la ïathuh bad pynpaw ïa ka jingbynñiaw namar kumba long mynta phra tylli ki païa jong katei ka skul ki la jot bad synjor, katba san tylli pat ki kamra jong ka mala ba shapoh ki la jot la pei bad ban pynlong skul pat ki hap ban pynlong noh ha ka mala kaba ar kaba don tang lai kamra.
U la ïathuh ruh ba naduh u snem 2019 ba katei ka skul ka la shah pynjot nyngkong, u la leit ban buh da ka jingthoh ha ki ophis sorkar kum ha ka ophis jong u BDO Ranikor, DMC, DSEO kumjuh ruh ha u nongmihkhmat. Hynrei kaba sngewsih ka long ba haduh mynta u snem (2023) ym shym la don ba wan mih.
Nalor kata, sa ha kawei ka jingjia kaba la jia ha ka shnong Mawpud ha kajuh hi ka sngi, kawei ka longïing jong ka Kong Balapynhun Ryntathiang ka la ngat ha ka jingshah tap khyndew. Ha kane ka jingjia, ka Kong Balapynhun ryngkat bad u kpa lem bad ka khun ki la lait salit na ka jingmynsaw da ka jingïarap lem ki paidbah shnong.
Ki tyllong khubor ki la ïathuh ruh ba kane jingjia ka dei ka sien ba-ar ba kane ka longïing ka la ngat ha ka jingshah pynjot ha ki bor jong ka mariang ha u snem 2017 hynrei haduh mynta kim shym la ïoh jingïarap eiei.
Shuh shuh sa kawei ka jingjia kaba la jia ha ka shnong Kensohsan ka lynti ban leit sha Nongjri, Ranikor Block ne ka surok Sub-way ka la dkut bad kad arliang bad kylla pynban ka lynti ïaid jong ka um. Kumba ka long mynta ki kali kiba dei ban ïaid lyngba kane ka surok ki la sahkut lut.
