Shillong, Jylliew 14:
U President Youth Wing ka HSPDP Sengkmie, Bah Sandondor Ryntathiang u la ïoh ban wan shim bynta ha ka jingïalang jong ka Voice of the People Party (VPP) kaba la long mynta ka sngi ha Sohïong.
U Bah Sandondor u dei u kyrtong ka HSPDP na Sohïong konstitwensi ha kane ka ilekshon MLA ba dang shu dep, hynrei la sngewthuh ba une rangbah u lah ban mih noh na kane ka seng ban leit pynïasoh pura noh sha ka seng VPP.
Ha kane ka jingïalang u Bah Sandondor ryngkat ki nongkitkam ka HSPDP ki la leit sha ka jingïalang ka VPP ha kaba u Bah Ardent Basaïawmoit u la wan ban ai jingpynshai ryngkat ki nongkitkam ka seng ha kaba palat hajar ngut ki paidbah ki la wan sngap sha kane ka jingïalang.
La ïohi ruh ba u Bah Sandondor u la poi sha madan haba u Bah Ardent u la poi ha katei ka jaka naduh basdang naduh ban da kut.
Nangta la ïohi ruh ba dei uwei uba ïeng kham hakhmat hajan ka pandal kaba shong u Bah Ardent namar u la ïoh ban don bynta ban ai jingthap kti haba u Bah Ardent u la ai jingkren ban pynsngew ïa ka nongrim ba ka VPP ka don.
Haba pyrshang ban ïakren bad u Bah Sandondor u la ïathuh ba haduh mynta u dang dei u nongkitkam ka HSPDP, pynban u shu wan ban sngap ïa ka jingïalang ka VPP ha Sohïong, hynrei um pat mih na ka seng haduh mynta.
Nalor kata, u la ïathuh bad u Bah Ardent u la ïadei la slem naduh ba u la rung sha ka seng HSPDP naduh ka ilekshon MLA ha u snem 2018 bad mynta ruh ka jingïadei ka don beit.
Shuh shuh u la pynpaw ka jingsngewkmen haba ka jingïalang ka VPP kaba hapdeng ka jingjur slap, hynrei ka rang noh shwa ban sdang ka jingïalang.
Wat la u Bah Sandondor u dang kam ba u dang dei u nongkitkam ka HSPDP, hynrei la sngewthuh ba la shem taïew u lah ban phah shithi iehnoh kam sha ka seng HSPDP na ka bynta ban rung pura noh sha ka seng VPP ban pynkhlaiñ ïa kane ka seng ha Sohïong konstitwensi.
