Shillong, Jylliew 14:
Ki Regional Committee ka Meghalaya bad Assam ki la ïakynduh lang ha nongbah Shillong na ka bynta ban shim ïa ki lad ki lynti ban pynbeit ïa ka jingïakajia pud ha thaiñ Block-I bad Khanduli-Psiar kiba hap ha West Jaiñtia Hills district bad West Karbi Anglong.
Ka Regional Committee na Meghalaya ka dei na ka bynta ki jaka ha West Jaiñtia Hills district bad ka Regional Committee na Assam ka dei na ka bynta ki jaka ha West Karbi Anglong.
Kine ki Regional Committee na baroh ar tylli ki Jylla ki la mynjur lang ruh ban phah ïa ki kaiphod sha la kajong ka Sorkar Jylla la kumno-kumno ha u Nailar mynta u snem.
Kane ka jingïakynduh lang ka dei ruh ka sien banyngkong jong kine ki ar tylli ki Regional Committee kiba dei ïa ka thaiñ West Jaiñtia Hills bad West Karbi Anglong kaba la long ha State Convention Centre, Shillong.
Ha kane ka jingïakynduh lang la don lang u Symbud Myntri Rangbah, Bah Sniawbhalang Dhar uba dei u Chairman ka Regional Committee na bynta ka West Jaiñtia Hills bad na ka bynta ka Regional Committee ka West Karbi Anglong District la lamkhmat da u Myntri ka Sorkar Assam, u Pijush Hazarika.
Hadien ka jingïakynduh lang, na ka liang u Bah Sniawbhalang Dhar u la ong ba ha kane ka jingïakynduh banyngkong, la ïakren kumno ban sdang thaw ki lad ki lynti kiba lah ban pynpoi sha ka jingpynbeit ïa u pud u sam ha kine ki thaiñ jong baroh ar tylli ki jylla.
U la ong ba ha ki sngi ban sa wan, ki dkhot jong kine ki Regional Committee kin sa leit ruh sha ki jaka khappud na baroh arliang mamla bad yn sa wanrah ruh ïa ka kaiphod hadien katto katne taïew.
U Bah Sniawbhalang Dhar u la ong ba ki Myntri Rangbah jong ki ar tylli ki Jylla kin sa leit lang sha kine ki jaka khappud.
Ha ka jingïakynduh jong ki ar Myntri Rangbah ha Khanapara dang shen, la rai ba ki ar Myntri Rangbah kin sa leit sha ki jaka khappud ka thaiñ Karbi Anglong bad West Jaiñtia Hills ha une u bnai Jylliew.
U Bah Dhar u la ong ba ka thong jong kine ki Regional Committee ka long ban phah ïa ki kaiphod la kumno-kumno ha u Nailar. Katba ha u Naitung kan don ka jingleit jurip lang ïa ki jaka khappud ban ïohsngew na ki paidbah khappud.
Kine ki Regional Committee kin sa ïakynduh biang ha u Naitung.
Halor ka jingdawa ba ki 36 tylli ki shnong ha thaiñ Block-I ki dei ban hap sha Meghalaya, u Bah Sniawbhalang Dhar u la ong ba ha kane ka jingïakynduh ym pat don ka jingbatai katno tylli ki shnong namarba ka kam ban leh haba ïadei bad ki jaka kan dang sdang bad ka jingai jingkheiñ kan sa mih ha ka jingïakynduh ban sa long biang.
