Shillong, Jylliew 14:
U Chief Secretary ka jylla, Bah DP Wahlang, un khlieh ïa ka kynhun lane ka ‘Search Committee’ ban wad bad jied ïa ki dkhot ki ban don ha ka ‘Expert Committee’ na ka bynta ban peit bniah ïa ka Reservation Policy 1972.
Nalor u Bah Wahlang, ka sorkar la thung ïa arngut ki dkhot kiba kynthup ïa ka Commissioner & Secretary ka tnat Personnel, ka Kong Ripnar Lyngdoh, bad u Secretary ka tnat Law, u Bah Cyril VD Diengdoh.
Ha ka jingpynbna ba la pynmih, la ong ba u Lat ka jylla u la thung ïa katei ka ‘Search Committee’ na ka bynta ban wad ïa ki briew ki ban long ki dkhot ka ‘Expert Committee’ ka ban peit bniah ïa ka State Reservation Policy kaba la pynbna ha ka 12 tarik Kyllalyngkot, 1972.
Kane ka ‘Search Committee’ kan aiti ïa ki jingai jingmut sha ka sorkar jylla hapoh shi bnai naduh ka sngi ba la pynmih ïa katei ka jingpynbna.
