Shillong, Jylliew 14:
Hadien ka jingpynmih hukum na ka Commissioner of Food Safety, ka Kong RM Kurbah kaba la mana ban khang shwa shipor ïa ka jingdie ïa ki dohkha kiba wan na shabar ka jylla namar ka jinglap ba ka don ka jingkhleh dawai ‘Formalin’ ha ki dohkha. Kumta na ka liang u Myntri ba dei khmih ïa ka tnad kam ri dohkha, u Bah A.L Hek u la ong ba u la bthah ïa u Secretary jong ka tnad ban thung da ka kynhun ka ban tih bad wad bniah ïa ki jingshisha lane ka Fact Finding Committee halor kane ka jingkynnoh ba ka don ka jingkhleh da ka dawai ‘Formalin’ ha ki dohkha.
Haba kren sha ki lad pathai khubor ha ka sngi balang hadien ka jingïakynduh bad ka kynhun jong ka Khasi Jaiñtia Fish Wholesellers and Retailers Association, u Bah AL Hek, u la ong ba hadien ka jingïakynduh bad katei ka Association, ka la ai jingmut ïa utei u Myntri bad ïa ka tnad jong u ba dei ban leh test shwa ïa baroh ki dohkha hapoh ka jaka kaba la wanrah ïa kitei ki mar la ka long na kino kino ki jylla ym dei tang na Andhra Pradesh.
U Bah Hek u la ong ba ka jingleh test ïa ki dohkha kam dei ban long tang ïa ki dohkha kiba wanrah napoh ka jylla Andhra Pradesh hynrei ka jingleh ïa ka test ka dei ban long ïa baroh ki dohkha kiba la wanrah na kiwei ki jylla ruh kumjuh.
“Ki la wanrah ruh ïa ka kaiphod kaba la wanrah naduh Andhra Pradesh kaba ym don kano kano ruh ka jingkhleh dawai ‘Formalin’ ha kano kano ki dohkha kiba wanrah ha khlieh Ïewduh bad lada ka dei napoh Assam ne la ka dei napoh Bengal ne na kano kano ka jaka ruh, ka dei ban don kawei ka jaka ban leh test ïa kine ki dohkha”, la ong u Bah Hek.
Haba kylli hato ka tnat ri dohkha ka ju phah peit bniah ïa ki dohkha ba wanrah nabar Jylla, namarba katkum ka kaiphod jong ka Food Safety wat haba ka la peitbniah ïa ki dohkha kiba wanrah nabar jylla, la lap ba la khleh dawai ‘Formalin’ ha ki dohkha, u Bah Hek u la ong ba katei ka jinglap ka dei ka jinglap jong ka tnad Food Safety bad u la ong ba ïa ka jingtohkit ha kaba ïadei bad ka jingkhleh dawai ‘Formalin’ ha ki dohkha kiba la wanrah shapoh ka jylla, yn nym ap nangno nangno ruh hynrei ka sorkar jylla kan ïaleh ban wad bniah hi lyngba ka Fact Finding Committee lajong kaba yn sa thung.
U Bah Hek u la ong ba halor ka hukum kaba la pynmih da ka Commissioner of Food Safety ban khang ïa ka jingdie dohkha la dei ban weng kham kloi khnang ba kito kiba im bad kamai lyngba ka jingdie ïa ki dohkha kin nym shah ktah satia.
“Nga la dep ong ïa u Secretary ba hapoh ka shisngi ne arsngi eiei, nga dei ban ïohi ïa ka kaiphod halor kane”, la ong u Bah Hek.
Shuh shuh u Bah Hek u la ong ba ka jylla Meghalaya ha ki snem kiba la leit, ka la lah ban pynmih dohkha tang kumba 32% hynrei mynta ka jylla ka la lah ban pynmih haduh kumba 50% tam.
Haba kylli hato ka sorkar kan leh kumno ha kaba ïadei bad ki pung dohkha lyngba ka Aquaculture jong ka sorkar kiba dei ban pynmih dohkha hynrei kitei ki pung dohkha ki kylla long pynban kum ki jaka ïakob khwai dohkha bad kaei kaba ka tnad ri dohkha kan leh ïa kitei ki trai jong kitei ki pung dohkha, u Bah Hek u la ong ba na ka liang ka tnad kam pat shim ïa kano kano ka rai ha kaba ïadei bad kane.
