Shillong Jylliew 15:
Ka Voice of the People Party (VPP) ha ka sngi Palei ka la kyntu ïa ka sorkar jylla ba ka dei ban buh jingkheiñ bha ïa ka jingdon jong ki briew ba wan phetwir na jylla Manipur ban rieh tngen ha Meghalaya namar ka jingmih jong ka jingïakynad kaba jur kaba la lam ruh sha ka jingïaumsnam ha Manipur.
Ha ka shithi ba la aiti sha u Symbud Myntri Rangbah ka Jylla, Bah Prestone Tynsong uba khmih ruh ïa ka tnat Kam Pohïing ka jylla, u General Secretary ka VPP u Dr Ricky AJ Syngkon u la pynpaw ba kum ka seng ka dap da ka jingsngewkhia ïa kaei kaba la jia ha jylla Manipur khamtam eh ban tip ba bun ngut ki nongshong shnong na Manipur ki la kylla long phetwir ban wan shong ha ka jylla Meghalaya.
“Ngi la aiti ïa ka shithi ha u Mynti ka tnat Kam Pohïing ka jylla bad kyrpad ïa u, ba dei ban buh ïa ki jingkheiñ kiba thikna jong ki phetwir kiba wan sha ka jylla, khnang ba tang shu wan phai ka shongsuk shongsaiñ ha Manipur, kitei ki phetwir kin ïoh ban leit phai biang sha ka jylla kaba ki wan,” la ong u Dr Syngkon haba kren sha ki lad pathai khubor.
Ha kawei pat ka liang, u Dr Syngkon u la ong ba kum ka VPP ka kwah ban ai ka jingïaroh ïa ka jingshimkhia ka sorkar jylla ba da ka jingsngew para briew ban ïarap ïa ki briew kiba la shah ktah na ka jingïakynad ha Manipur. Hynrei ha kajuh ka por, da ka jingpyrkhat na ka bynta ka bha ka miat jong ka jylla bad ki paidbah, kitei ki phetwir kiba la wan sha ka jylla ki dei ban leit phai biang hadien ba la wanphai ka shongsuk shongshngaiñ ha ka jylla Manipur.
