Shillong, Jylliew:
Ka synjuk jong ki nongtrei ïing briew ba la tip kum ka All Meghalaya Domestic Workers Union ka la dawa na ka sorkar jylla ba ka lah dei ka por ba ka sorkar kan ai noh ka jingithuh ïa katei ka kynhun ïa ka kam kaba ki trei bad ban don ka jingïoh na ka liang jong ka sorkar bad ba ka sorkar kan kynthup ïa ki ha ka thup jong ka Minimum Wages Act khnang ba ki lah ban im bad ban lah pyndap ïa la ka ïing ka sem.
Haba kren sha ki lad pathai khubor ha ka sngi balang ka 14 tarik u bnai Jylliew ha Shillong Press Club, ka Kong Ebina Nongkhlaw kaba dei ka dkhot jong ka Member jong ka All Meghalaya Domestic Worker’s Union, ka la ong ba ka jingmih jong ki ban kren sha ki lad pathai khubor ka dei ruh namar ka dei ka taïew jong ka jingrakhe kynmaw burom ïa ka sngi jong ka All Meghalaya Domestic Workers Union bad ka la pynpaw ïa shibun ki jingeh kiba kum ki nongtrei ïing briew ki ju mad na ka por sha ka por.
Ka Kong Nongkhlaw ka la ïathuh ba bunsien kum ki nongtrei ïing briew ki ju shah nioñ beiñ ha ki trai ing haba ki leit trei sha ki jing ki dei na kane ka daw kaba pynlong ia ki ban mih sha khmat ban dawa na ka sorkar ba ka dei ban ithuh noh ïa ki da ka aiñ khang ba kin don ka jingshngaiñ haba ki trei.
“Ïa kane ka kam kaba ngi trei la donkam ka jingithuh bad ban don ka jingïoh na ka liang jong ka sorkar”, la ong ka Kong Nongkhlaw.
Ka Kong Nongkhlaw ka la ïathuh ba hapoh ka Union ki don haduh kumba 3000 ki dkhot kiba la pynrung kyrteng hapoh katei ka kynhun hynrei ki don ruh pat shibun kiba don shabar jong ka kynhun. Kumta ka donkam ïa ka sorkar ba kan pynïaid bad pynrung kyrteng ïa baroh ki nongtrei ïing briew ba kin ïoh ban rung ha kawei ka thup khnang ba ka sorkar ka lah ban ai jingïarap na ka liang jong ka.
Ka Kong Nongkhlaw ka la ong ba ka sorkar ka dei ruh ba ai ïa ki lad jingïarap kum ki skhim, ba kan buh ïa ki aiñ kiba kynthup ïa ka jingai jingshngaiñ bad kumjuh bad ki aiñ kiba ïadei hapdeng ki nongbylla bad ki trai kiba ai kam ïa ki khnang ba kan don ka jingithuh hapdeng jong ki.
“Ka dei ban don ka jingsngew shngaiñ ha kaba lada kum ka jingmynsaw lane lada long kumno kumno ha ka jaka trei jaka ktah ruh, ngin ïoh ïa kata ka jingïarap ha kaba ngi lah ban sumar bad kum ki riew kynthei, ngi lah ban ïoh ruh ïa kata ka shuti pun khun kumba ïoh lang kiwei ki nongtrei bad ynda ha ka por ba ngi leit biang, ngin nym duh noh ïa kata ka jingtrei”, la ong ka Kong Nongkhlaw.
