Shillong, Jylliew 15:
Kawei ka kali Pick-Up kaba kit hynriew ngut ki briew na Mawsynram ban leit sha Thieddieng, East Khasi Hills District ka la hap sha riat kaba jylliew naduh ka 13 tarik Jylliew, 2023 bad la lap noh mynta ka sngi ka 15 tarik Jylliew, 2023 hadien ba la wad shnong naduh ba ki khlem poi sha shnong.
Katkum ka jingwad jingtip na ki bahaïing hasem jong kine ki briew kiba shong hapoh ka pick-up, la ïathuh ba kane ka kali ka dei kaba ju kamai ïa ki nongleit nongwan ïa kiba na shnong Thieddieng sha Mawsynram. Hynrei ha ka 13 tarik Jylliew haba kane ka kali ka la wan na Mawsynram ban leit buh briew sha Thieddieng ka la hap noh sha riat.
La ïoh jingtip ba ha kane ka kali la don 6 ngut ki briew kiba shong, kata 3 ngut ki shynrang kiba kynthup ïa u nongñiah bad lai ngut ki kynthei kiba kynthup ïa i khyllung ba dang 2 snem ka rta.
Ki bahaïing hasem ki la ïathuh ba ka jingbym poi kynmaw ban wad ïa kata ka kali ka dei namar u nongñiah ïa kane ka kali u dei na Thieddieng tangba u sah ha Mawsynram. Kumta ki bahaïing hasem kiba sah ha Mawsynram ki la mutdur beit ba u la sah sha Thieddieng bad kiba na Thieddieng ki la mutdur ba u la sah sha Mawsynram.
Ka jingsdang ban wad ïa katei ka kali lem bad ki briew kiba shong ka long hadien ba ka khun jong ki arngut na ki hynriew ngut kiba la don ha katei ka kali, bad kaba sah ha Thieddieng ka la khie shit ha ka miet jong ka 14 tarik mynta u bnai bad ka la wad ïa ka kmie bad u kpa. Hynrei ki bahaïing kim shym la lap bad dei ha kum kane ka por ba ka shnong Thieddieng naduh ka miet jong ka 14 tarik bad haduh ka step jong ka 15 tarik ki la wad shnong ïa u nongñiah ïa ka kali bad ïa ki briew kiba la jah ki bym poi ïing shuh.
Haba la wad shnong ki la phah peit ha lynti-lynti ïa ki nongñiah kali kiba leit sha Mawsynram bad ki para nongñiah ki la lap ba don ki ïit kiba la pait. Kumta ki nongshong shnong mynta ka sngi ki la leit wad sha riat bad la lap ba kine ki hynriew ngut kiba shong ha ka kali ki la khlad lut.
Napdeng kine ki hynriew ngut kiba shong hapoh kali, ar ngut ki dei shi kmie shi kpa kiba na Thieddieng kiba la leit shim dawai ïa i khun ba dang 2 snem ka rta sha Mawsynram.
Ki bahaïing hasem ki la pyntip ba ïa kane ka kali la lap ha trai riat ha ka por 3 baje janmiet. Kumta haduh ba thoh ïa kane ka khubor ym pat lah ban sei ïa kitei ki briew na katei ka riat.
