Shillong, Jylliew 15:
Ka kynhun ki seng bapher-bapher ba la tip kum ka SOMALA (Social Organisations of Meghalaya Against Land Alienation) ha ka Sngi Palei ka la pynkynmaw ba ka jylla ka don ïa ka Land Transfer Act lane ka Meghalaya Transfer of Land Regulation Act, 1971 kaba la khang ïa ki khlieh nongsynshar ban ai kot eiei halor ka khyndew ka shyiap sha kiwei pat ki jaitbynriew.
U Bah W Anthony, uba dei u Convener ka SOMALA, ha u kyrwoh khubor, u la ai ïa katei ka jingkynthoh hadien ka jingmih khubor ba ki don kiwei pat ki jaitbynriew kiba la sdang ban leit pan kot na ki khlieh nongsynshar ban ïoh long nongshong shnong ha Meghalaya.
“Ka Land Transfer Act ka mana bad khang lad ruh bym bit ban die jaka sha u mynder ri (non-tribal). Kumta la kyrpad ïa ki khlieh nongsynshar ban nym ai kot (Pata/NoC) halor ka khyndew ka shyiap khnang ba ki mynder ri kin nym ïoh bsut khlieh ban long trai shnong ha Meghalaya,” la ong u Bah Anthony.
Ka SOMALA ka la kyrpad ruh ïa ka sorkar jylla bad ka District Council ban leh pyrkhing bad shimkhia halor kane ka jingma kaba ap ïa ka jaitbynriew.
