Shillong, Jylliew 15:
Ka Hynñiewtrep Achik National Movement (HANM) ha ka sngi Palei ka la pynpaw ba ka seng hi baroh kawei ka ai ka jingkyrshan kaba pura halor ka jingdawa ba dei ban pynbeit thymmai ïa ka Job Reservation Policy lane ka bhah thung kam thung jam jong ka jylla, hynrei kane ka mat kam dei ban long kaba noh shiliang ka ban pynsngewsih ïa ki jaitbynriew Khasi-Jaiñtia lane Garo.
Haba kren sha ki lad pathai khubor ha Shillong Press Club, u President ka seng u Bah Lamphrang Kharbani u la ong ba kane ka mat ban pynbeit thymmai ïa ka bhah thung kam thung jam jong ka jylla kam dei tang ha ki kti jong ka sorkar jylla, hynrei ka shong ruh ha ka sorkar pdeng bad ha ka ïingbishar kaba ha khlieh duh.
U Bah Kharbani u la ong ba ka seng ka sngewthuh ba ki Jaitbynriew Garo kin nym pdiang ïa ka jingshah khate ïa ka bhah ka jong ki bad kumjuh ki jaitbynriew Khasi-Jaiñtia ruh kin nym pdiang ïa kane. Khnang ba ka jylla kan don hapdeng ka jingshongsuk shongshngaiñ ka donkam ka jingïasyllok bad hap ban shim ïa ka rai jong ka jingïamynjur lang.
“Khlem da ktah ïa ka jingmut jong ka bhah kam bhah jam kaba 40% ïa ki Khasi-Jaiñtia, 40% ïa ki Garo, 5% ïa ki SC bad OBC bad 15% ka long ïa baroh katkum ka jingtbit ka jong ki,” la ong u Bah Kharbani.
Nalor kata, u Bah Kharbani u la ong ban shu khate noh ïa ka bhah jongno-jongno da ka sorkar khlem da pynkylla shirta ïa ka riti synshar ka ri ïa ki Article kiba ïadei bad ka bhah kam bhah jam ne khlem ka rai jong ka ïingbishar jong ka Ri India, kata ka Supreme Court kan wanrah ïa ka jingbymhun bad ka jingsngewsih hapoh ka jylla Meghalaya baroh kawei.
Shuh shuh u Bah Kharbani u la ai khublei ïa ka seng Voice of the People Party(VPP) kaba la shimkhia halor kane ka mat bad ïa ka sorkar MDA kaba la mynjur ban thaw da ka Expert Committee ban pynbeit thymmai ïa ka bhah thung kam thung jam jong ka jylla kaba la neh kumjuh mynta la 51 snem eiei.
Namar kata, u Bah Kharbani u la kyrpad ba ki seng saiñ pyrthei ki dei ban don ka jingïatylli halor kane ka mat khnang ba kin wad ïa ki lad ki lynti ban wanrah ka jingbha ha ka lad ïoh kam ïoh jam na ka bynta ki paidbah ka jylla. U la ong ruh ba shen ka seng ynda ka la ïoh jingtip ïa ki dkhot jong ka Expert Committee, kan sa phah ïa la ka jingai jingmut.
“Kum ka seng ka kren shai ba ki seng saiñ pyrthei kim dei ban ïalehkai ïa kane ka kam im ka kam ïap jong ki samla pule bad kim dei ban ïalehkai saiñ pyrthei bad kane ka bhah thung kam thung jam”, la pynkut u Bah Kharbani.
