Shillong, Jylliew 15:
Ka Hynñiewtrep Achik National Movement (HANM) ha ka sngi Palei ka la leit ban aiti da ka jingthoh ha u Myntri ka sorkar jylla, u Bah Paul Lyngdoh bad uba dei ruh u Chairman jong ka Regional Committee ka West Khasi Hills District ha kaba ïadei bad ka jingpynbeit pud hapdeng ka Meghalaya bad ka Assam.
Haba kren sha ki lad pathai khubor ha Shillong Press Club, u Bah Kyllang Thongni uba dei u General Secretary ka HANM Sengkmie, u la ong ba ka seng ka khmih lynti ba lyngba kane ka Regional Committee hapoh ka jingïalam jong u Bah Paul, ka jingïapynbeit khappud kan long kaba ïaid beit khlem don kino kino ki jingshah pynthut ne ka jingshah pyndik bad ba um dei ban pynjem katkum ka jingkwah jong ka sorkar Assam, hynrei u dei ban ïeng halor ka nongrim kaba skhem kaba la dep ban ïakren.
“Lada kane ka Regional Committee ha ka jingpyrshang jong ka sorkar ban wanrah ïa kano kano ka jubab ban weng ïa ka jingïakynad kam lah ban leh eiei, khlem artatien ha kawei ka sngi kan sa bthei bad haba bthei kan don ka jingmynsaw”, la ong u Bah Thongni.
U Bah Thongni u la kyntu ïa ka Regional Committee jong West Jaiñtia Hills hapoh ka jingïalam jong u Bah Sniawbhalang Dhar ba um dei ban shu shah jem katba ka Assam ka dawa ne ka ong, hynrei u dei ban pyntikna ba wat shi inshi ka jaka kaba dei hok jong ka jylla Meghalaya ym dei ban lilam ei sha ka sorkar Assam.
Ka seng ka la kyntu ruh ïa ka sorkar jylla ba kan pynsngew sha ka Election Commission of India (ECI) pyrshah ïa ki briew kiba shong ba sah ha ki thaiñ Langpih kiba don artylli ki EPIC, kata kawei na ka jylla Meghalaya bad kawei na ka jylla Assam.
Nalor kane, u Bah Thongni u la kynnoh ruh ba ki briew kiba shong ba sah ha ki thaiñ khappud khamtam ki bym dei na ka jaitbynriew Khasi ki la don artylli ki EPIC na baroh artylli ki jylla. Bad dei namar kane ka daw ka la pynlong ïa ki artylli ki sorkar ba kin shem jingeh kaba khraw ban pynbeit bad weng ïa kane ka jingïakynad khappud kaba la neh mynta la kumba 50 snem tam eiei ha ka thaiñ Langpih.
Namar kata, u Bah Thongni u la ong ba ka jingdawa na u Chairman jong ka Regional Committee ka long ban shimkhia bad pynsngew ïa kane sha ka ECI bad ban thaw da ka Committee ka ban tohkit ban lap ïa ka jingshisha halor kane khnang ba ka jingïakajia khappud hapoh ka thaiñ Langpih yn lah ban weng ha ka lynti kaba dei.
“Ngi la dawa na u Chairman jong ka Regional Commitee ba un shimkhia halor kane bad ka ECI bad ba dei ban thaw da ka Enquiry Committee ban lap ïa ki jingshisha halor kane ka jingleh khnang ba ka jingïakren pynbeit khappud ha Langpih ka lah ban long ha ka lynti kaba dei”, la ong u Bah Thongni.
U Bah Thongi u la ong ba ki paidbah na baroh artylli ki jylla kata napoh ka jylla Meghalaya bad ka jylla Assam kiba shong ba sah ha ka thaiñ Langpih ki don artylli ki EPIC. Kumta ka seng ka la kyntu ïa utei u Myntri ba ka jingïakren khappud kan nym dei ban long da kaba peit ïa ka EPIC.
