Shillong, Jylliew:
Ka Rev. J.J.M. Nichols – Roy Memorial Committee ka la pynlong ïa ka jingïalang ban kynmaw burom ïa ka lyngkhuh sngi kha ka ba 139 jong u Rev. J.J.M. Nichols Roy ha ka 12 tarik u bnai Jylliew, 2023.
La kha ïa u Rev. J.J.M. Nichols Roy ha ka 12 tarik u Jylliew, 1884 ha Shella. U dei u khun ksiew jong u Tirot Sing Syiem. Hadien ba u la pass ïa ka ‘entrance examination’ na ka Govt. Boys High School u la leit pule pat ha Kolkata ha Scottish College. Ynda u la dep pule u la wan phai pat sha la ka jong ka ri bad u la long uwei na ki ‘riewkhraw jong ka jaitbynriew.
Ha kane ka sngi la ai khusnam ïa ki 3 ngut ki samla pule ka Rev. J.J.M. Nichols Roy College kiba la ïoh bun marks eh ha ka B.A da i Prof. (Mrs.) Badaplin War (Padma Shri) kum I Kongsan. Ha ka jingkren jong i kongsan i la pynkynmaw ba u Rev. J.J.M. Nichols Roy u la long uwei na ki nongïalam ba radbah jong ka jaitbynriew Khasi Jaiñtia u ba la noh synniang shikatdei eh ha ka imlang ka sahlang bad ruh ha ka jingshakri ïa ka jaitbynriew kum u Myntri Khristan bad ruh kum u ‘riewshemphang bad u ‘riew sngewthuh. Kum u dkhot jong ka Constituent Assembly u la ïoh lad ban pynrung ïa ka 6th Schedule hapoh ka Konstitushon jong ka Ri India, kaba la long shisha ka jingïada ïa ki paid riewlum ha ka thaiñ shatei lam mihngi jong ka ri baroh kawei kaba kynthup ïa ka jingïada ïa ka jaka puta bad kiwei kiwei ki lad jingïada.
U President ka Governing Body jong ka Rev. J.J.M. Nichols – Roy College u Rev. Dr. A.C. Moore u la ong ba u Rev. J.J.M. Nichols Roy u don ka jingngeit kaba skhem kum u nongïalam khristan uba ngeit ha u Jisu Khrist bad u ba ïai pynpaw ïa ka jingieit jong u Blei ïa ka Ri Khasi Jaintia. U la ong ruh ba ka pateng ba mynta ki ngeit ha u Jisu hynrei ki briew kim ïohi ïa u Jisu ha ka jingim jong ki.
Kiba la ai jingkren ha kane ka sngi kynthup ïa u Bah Ransom Sutnga Chairman, Bah H.S. Suting Secretary Rev. J.J.M. Nichols Roy Memorial Committee. U Bah Suting u la pynkynmaw ba ka Sorkar ha ka snem 1969 kum ka dak ka jingñiewkor bad burom ïa u Rev. J.J.M. Nichols Roy ka la ai kawei ka madan ban pynsahnam bad burom ïa ka kyrteng jong u ha ka Plot No.1 kaba markhap bad ka Govt. Boys Secondary School kaba hajan Jaiaw Student Field ba la ju tip kum ka Madan kyndong. Kane ka Committee ha ki snem kiba mynshuwa ka la ju ai khusnam ïa ki samla pule kiba pass bha ha ka Science bad Arts Stream kum ka jingpynshlur ïa ki samla pule ba kin kiew shaphrang ha ki jingpule jong ki.
U Chairman bad ki Member ba nyngkong jong kane ka Committee ki long Prof. G.G. Swell, Deputy Speaker Lok Sabha Vice Chairman P.R.Kyndiah ki dkhot: B.B. Lyngdoh, D.D. Pugh, S.D.D. Nichols Roy, J.N. Bawri, Kong E.N. Shullai, Kong Q. Rynjah bad A.K. Shahoo.
Kiba la ïa don ha kane ka jingïalang rakhe ïa ka sngikha bad 139 jong u Rev. J.J.M. Nichols Roy ki kynthup ïa u Rev. Dr. B.R. Sohkhia, Rev. R. Imiong, Principal ka Rev. J.J.M. Nichols Roy College ki nonghikai bad ki samla pule jong ka kolej.
