Shillong, Jylliew 15:
Ha kawei ka jingjia kaba suba shah pynïap, la lap ïa kawei ka longkmie ba ka la khlad ha ïingsah lade, ha kaba u kurim jong ka u la kam ba ka kurim jong u ka la shim ïa la ka jingim da kaba shu phasi.
Kane ka la jia ha ka miet 14 tarik Jylliew ha Mawlai Mawdatbaki Mali-I.
Ïa kane ka longkmie kaba khlad la tip kum ka Kong Steffanie L Nonglait bad ka sah lang ha kane ka ïing bad u kurim uba tip kum u Bah Trophius Nongbri.
Ki bahaïing ka Kong Steffanie ki la suba jur ba ka shah pynïap ha la u jong u kurim bad ïa ka ejahar la ujor da ka Kong Amanda L Nonglait kaba dei ka para jong ka longkmie kaba khlad ha Thanat Mawlai ha ka sngi palei.
Ka Kong Amanda ka la ïathuh ba ha por 9 duna ne 9 baje mynmiet jong ka 14 tarik, la ïoh ïa ka khubor ba ka hynmen jong ka, ka la khlad ha kaba u kurim jong ka u Bah Trophius Nongbri, u la wan ïathuh hi dalade sha Mawlai Nongpdeng ba ka kurim jong u ka la leh kulmar bad ka la phasi ïalade.
Ka Kong Amanda, ka la ong ba ynda la leit sha ïing sah jong ki ha Mawdatbaki Mali-I, ki lap pynban ba ka rukom ïap jong ka hynmen jong ka, ka long kaba pynsuba sniew namarba ki don ki dak ki shim ha ryndang bad ïa ka met ïap la tap da ka nep ha jingthiah. Kane ka la pynartatien ïa ki bahaïing namar kam ïahap bad kaba ïathuh u kurim jong ka uba la kam ba kurim jong u ka la shim hi ïa la ka jong ka jingim da kaba shu phasi.
La ong ba kane ka longkmie ka la armet bad i khyllung ha kpoh i dang don 2 ne 3 bnai.
Ka Kong Amanda ka la ong ba ka ïing ka la duh ar ki mynsiem, jong ka hynmen jong ka, bad ka mynsiem ba lui lui i khyllung i ba don 2 ne 3 bnai ha kpoh.
Ka la ong ba kum ka ïing, ym lah satia ban pdiang ba ka hynmen kan shu ïap hi, khamtam namarba kam don kano kano ka jingshitom.
Ïa ka met jong ka Kong Steffanie la pynkit sha NEIGRIHMS ban pyndep ïa ka post mortem bad hadien ba la pyndep, la aiti ïa ka met sha ki bahaïing.
Na ka liang ki pulit ki dang tohkit ïa kane ka jingjia bad ki la rah noh ïa u kurim jong ka Kong Steffanie ban kylli jingkylli kum shibynta jong ka jingtohkit.
Na ka liang ki bahaïing bad ka kur Lyngdoh Nonglait baroh kawei ki pynpaw ka jingsngewsih kthang halor kane ka jingjia.
Uwei na ki nongïalam jong ka kur Lyngdoh Nonglait u Dr D.R.L Nonglait u la ong ba kane ka jingjia ka long ka jingjia kaba sngewsih kthang ïa ki bahaïing bahasem khamtam ïa ka kmie.
Ka kur ka la pynrem jur haba ïadei bad kane ka jingjia kaba la pyntieng pynsmiej ïa baroh bad dawa ban pynshitom katkum ka aiñ.
Kumta na ka liang ka kur ka la ai mynsiem ruh ba kan ym iehnoh ïa kane ka ïing bad kin ïai donlang haduh ba kin da ïoh ïa ka jingbishar kaba hok.
