Shillong, Jylliew 15:
Ha kawei ka jingjia, lai ngut ki samla shynrang na ka shnong Muphlang kaba hap ha ka jingpeit ka thanat Jowai ha West Jaiñtia Hills, ki la shah rahbor ha ki runar ha Assam, hynrei ki pulit ka Morigaon District ki la ïoh ban pyllait im ïa ki bad la kem ïa saw na ki hynriew ngut ki runar kiba la donkti ha kane ka kam be-aiñ.
Na ka liang U Nongsaiñ Hima ha ka Sngi Palei u la ïoh ban ïakren bad u SP ka Morigaon distrik, u Hemanta Kumar Das, bad u la batai shaphang katei ka jingjia.
U SP u la ïathuh ba ha ka 13 tarik Jylliew ha ka por kumba 9:30 mynmiet, ki pulit ka Morigaon ki la ïoh jingtip na u OC ka thanat Jowai ba lai ngut ki samla na ka shnong Muphlang, West Jaiñtia Hills ki la leit sha Jagi Road da kawei ka kali Bolero Pick-Up. Hynrei kine baroh lai ngut ki la shah rahbor ha ki runar bad kita ki runar ki la kren sha ki bahaïing hasem jong ki lai ngut bad ki la dawa pisa.
U Das u la ong ba mar ïa ïoh ïa kane ka jingtip, ki pulit ki la pynlong ïa ka jingbuddien ïa u Mobile Number ba kitei ki runar ki la pyndonkam bad la shem ba ki don ha ka thaiñ Amlighat kaba hap ha thanat Jagi Road.
Na ka liang u OC ka Jagi Road, u Inspector Moon Prakash Tiwari lem bad kiwei ki pulit ki la leit sha katei ka jaka bad ki la rung ha ka ïing jong uwei u briew ba la tip kyrteng kum u Biju Boro ha Amlighat Sindisar. Ha ka jingkhynra ïa kane ka ïing, ki pulit ki la lap ïa kitei ki lai ngut ki samla ba la shah rahbor.
La shem ba kita ki lai ngut ki samla na West Jaiñtia Hills ki la shah shoh shah dat bad ki runar ki la knieh ruh ïa ka pisa lyngba ka GPAY. U SP u la ong ba lyngba ka GPAY ki runar ki la lute kumba T. 30,000. Kita ki runar ki la lute ruh sa T. 16,000 kaba dei ka pisa kaba don ha met kitei ki lai ngut ki samla. Hynrei ki pulit ki dang wad sa ïa ka sati ksiar kaba ki runar ki la knieh na uwei na kitei ki lai ngut.
Ha kajuh ka por, u SP u la ong ba kitei ki runar ki la dawa T. 4 lak na ki bahaïing jong kitei ki lai ngut khnang ba kin pyllait im ïa ki.
U SP u la ong ba kiba donkti ha katei ka kam be-aiñ ki long hynriew ngut tangba la ïoh kem saw ngut naba arngut ki la ïoh phet krad na katei ka jaka bad ka jingthwet ban kem ïa ki ka dang ïaid.
Ki saw ngut kiba la shah kem ki kynthup ïa u Abdul Hannan, 32 snem ka rta, u Habib Ahmed, 34 snem ka rta, u Fatir Ahmed, 30 snem ka rta bad kine baroh ki dei na Hojai distrik jong ka Assam. Sa uwei pat uba la shah kem u dei u Manab Jyoti Konwar, 25 snem ka rta na Nagaon distrik, Assam. Ïa kine saw ngut kiba la shah kem la phah noh sha along.
U SP u la ïathuh ba kitei ki lai ngut ki la poi sha Jagi Road hadien ba ki la shah khot na ka bynta ki kam kiba ïadei bad ka jingkhaïi ktung. Hynrei ki la shah rahbor pynban ha ki hynriew ngut ki runar. U SP u la ong ba ïa kitei ki lai ngut la aiti noh sha ki bahaïing hasem jong ki.
Shuh shuh ki pulit ka Morigaon ki la ïoh ban kurup lai tylli ki Mobile Phone, kawei ka kali ka bym don nombor, kawei ka kali Bolero Pick-Up ba la pyndonkam da kitei lai ngut ki samla na West Jaiñtia Hills, bad ka pisa T. 95,000.
