Shillong, Jylliew 15:
U Myntri ka tnat Social Welfare ka jylla, Bah Paul Lyngdoh haba kyntait ïa ki jingkynnoh ka Meghalaya State Commission for Women (MSCW) u la ong, “Nga khlem pynmih ïa ka hukum ban weng kam ïa ka Chairperson jong ka Meghalaya State Commission for Women (MSCW) tang na ki hamsaïa”.
Haba pyntip ba ka Sorkar Jylla kan sa thung noh mynta ïa ka briew ka bym don jingïadei ha ki kam saiñ pyrthei kum ka Chairperson ba thymmai ka Meghalaya State Commission for Women (MSCW), u Bah Paul u la ïathuh ba ka tnat Social Welfare kan sa thaw ïa ka Search Committee ban wad ïa kane ka Chairperson ba thymmai.
“Ki jingkdew ki la mih bunsien ha ki lad pathai khubor ba balei ka sorkar ka jied ïa ki briew na ki seng saiñ pyrthei, kane ka dei ka mat kaba la ju ïakren bha bad mynta ka jingthmu jong ka Sorkar ka long ba kan thung ïa ka briew ka bym don jingïadei bad ki seng saiñ pyrthei, kaba lah ban treikam bad kaba sngewthuh ïa ka jingeh jong ki kynthei,” la ong u Bah Paul haba kren sha ki lad pathai khubor ha ka sngi Palei.
Shuh shuh haba kdew ïa ka jingkynthoh ka Chairperson, u Bah Paul u la ong, “Nga khlem pynmih ïa ka hukum tang na ka jingïoh khubor bad jingïakren ki briew. Nga la pule bniah ïa ki file. Ka don ka kaiphod ba la batai shai ba ka Chairperson namar ba ka bat ïa ka kam, ka dei ban ïadonlang haduh 4 tylli ki jingïalang ka Commission. Ki jingthoh jong ki ‘file’ ki la batai da kumwei nalor ba ka don ruh ka jingujor pyrshah ïa ka (Chairperson) ba ka ïashim bynta pylleiñ pylleiñ ha ki jingïalap ilekshon”.
“Nga la pule ïa ki kyndon jong ka Women Commission Act. Nga la pule lut ïa ki file noting bad nga tip ïa kaei kaba nga leh hynrei ka long ruh kaba kongsan ïa nga ban ong ba kum u briew uba la bam smai ha ka kyrteng U Blei ban treikam khlem ka jingsheptieng ne shah liang, jingsngew ieid ne shun, nga jied ban trei ïa kaba dei ban ïa kaba pawnam,” u la ong.
Haba kylli, u Bah Paul u la ong, “Kane ka long ruh shi bynta jong ka jingtohkit bad la dep ruh ban ai show cause sha ka (Chairperson) ba ka ïashimbynta ha ki jingïalap ilekshon. Ngam don eiei ban kren pyrshah ïa ka briew hynrei nga kren ïa kane ka kam na ka jingïohi ba haba phi shong ha ka shuki, phi dei ban don shibun ka por ban aiti ïalade ha ka kam bala bynshet bad lada phi don liang ruh bad ki seng saiñ pyrthei, ka jingpynleit jingmut jong phi ruh ka la ïaphiah noh”.
Ha kaba ïadei bad ka jingweng kam noh ïa ka Kong Phidalia Toi na ka shuki Chairperson, u Myntri u la ong ba un sa pyntip ïa kane ha ka jingïalang jong ka Kynhun Myntri ryngkat bad ki daw baroh ba un buh hakhmat bad ruh ban shim ïa ki jingai jingmut na ki dkhot ka Kynhun Myntri.
