Shillong, Jylliew 15:
Lai ngut ki samla kiba shah hikai ha All India Services Pre-Examination Training Centre (AISPETC) kaba don ha Meghalaya Administrative Training Institute (MATI), Mawdiangdiang ki la pass ïa ka eksamin Civil Services (Preliminary) kaba la pynlong da ka Union Public Service Commission (UPSC) bad mynta kin pynkhreh ban ïakhun sa ïa ka eksamin Civil Services (main) ka ban long ha u Nailur mynta u snem.
Kine lai ngut ki samla kiba na AISPETC kiba la pass ïa ka wat banyngkong jong ka eksamin Civil Services ki long, Nidakyrkhu Dkhar, Ammiel Azareel Syiem, bad Thomas Edison Sumer.
Ka AISPETC ha MATI Mawdiangdiang ka ju ai jinghikai kumba 125 ngut man u snem ha kine ki 2 snem ba la dep.
Kane ka shlem ai jinghikai mynta kan pynkhreh ïa kine ki lai ngut ki samla ba kin ïakhun sa ïa ka eksamin Civil Services (main) ka ban long ha u Nailur mynta u snem khnang ba kin lah ban poi sha ka thong.
Ki don palat 10 lak ngut ki samla kiba la thoh ïa ka eksamin Civil Services (Preliminary), hynrei kiba pass ki long tang 14,000 ngut ki ban sa ïoh ban ïakhun ïa ka eksamin Civil Services (main).
Kane ka shlem ai jinghikai ka don ruh ka hostel na bynta 75 ngut kiba wan ban sah na kylleng ka Jylla bad ki nonghikai ruh ki dei kiba wan na kylleng ka ri India ban ai jinghikai ïa ki samla ha MATI, Mawdiangdiang.
Ki jinghikai bad eksamin kiba pynlong ha kane ka shlem man ka por ki la long ka jingïarap ïa kine ki lai ngut ki samla ha kaba iwei na ki, dei ba sah ha hostel.
