Nongpoh, Jylliew:
Ka Federation of Khasi Jaiñtia and Garo People (FKJGP) North Khasi Hills District sa shisien pat ka la mih biang shakhmat ban pynsngew sha ka sorkar jylla halor ka jingdawa ban thaw ïa ka shlem treikam jong ka Community & Rural Development (C&RD) Block ha Mawhati kaba dei ruh kawei na ki mat jingdawa jong ka thaiñ kaba la slem bha.
U Bah Shanlang Diengdoh, General Secretary ka FKJGP-NKHD u la ong ba ha ka jingbym don jong ka ophis C&RD Block ha katei ka thaiñ ka la buh jingeh shi kat dei ïa ki paidbah nongshong shnong kiba la nang kharoi bad nang bun kat nang mih ki snem.
U la ïathuh ruh kumba long mynta, ki shnong na ka thaiñ Mawhati ki hap ha ki lai tylli ki C&RD Block, kata ha Umsning, Umling bad Bhoirymbong kaba jngai shi kat dei eh khamtam ïa kito ki shnong kiba don ha ki thaiñ khappud bad ka jylla Assam.
Kumta ban pynsuk ïa ki paidbah bad ruh ban wanrah ïa ka roi ka par khamtam kum ha ka thaiñ Mawhati kaba dang sahdien, ka la donkam ba ka sorkar kan thaw noh ïa ka ophis ba thymmai jong ka C&RD Block hapoh ka thaiñ, kumba long lem kiwei kiwei ki thaiñ jong ka jylla. Halor kane ka bynta, na ka liang u Bah Shanlang Diengdoh u la buh ruh ka jingkyntu ïa u MLA jong ka Mawhati, u Bah Charles Marngar ba un shimkhia ban pynsngew bad kyntu ïa ka sorkar jylla ban pynurlong ïa kane ka jingangnud jong ki paidbah ka thaiñ Mawhati.
