Nongpoh, Jylliew:
Kum shi bynta na ka jingrakhe ïa ka World Blood Donors Day (WBDD), ka Ri Bhoi District Cricket Association (RBDCA) ha ka sngi Balang ka la leit ban synñiang da ka snam ha ka Blood Bank jong ka Nongpoh Civil Hospital.
Ïa kane ka jingsynñiang snam mynta ka sngi la lamkhmat da u President ka RBDCA, u Bah Rayonald Kharkamni ryngkat bad shiphew ngut kiwei ki nongkitkam bad ki dkhot jong ka seng.
Haba kren sha ki lad pathai khubor hadien ka jingsynñiang snam, u Bah Rayonald Kharkamni u la ong ba kane jingthmu jong kane ka jingai snam ka long kum shi bynta ban rakhe ïa ka World Blood Donors Day bad ruh khamtam eh ban ai jingim ïa ki briew kiba pang ba shitom kiba donkam snam kyrkieh.
U la ong ruh ba na ka liang ka seng, ka la ju ai snam na ka por sha ka por bad lyngba kane ka jingai snam, kan long ruh ka jingpynshlur ïa kiwei de ki ‘riew paidbah ba kin wan shakhmat ban synñiang ïa ka snam ba kordor khnang ba kan long ka jingïarap bad ai jingim ïa ki briew kiba donkam kyrkieh.
