Shillong, Jylliew 15:
Ki pulit ka nongbah Shillong ki la pynlong ka jingkhynra ïa ki kot kali jong ki taksi kiba kamai khlem pat siew ka khajna sha ka sorkar jylla ha ka sngi Palei ha Khyndai Lad.
Kane ka jingkhynra ïa ki kot kali ka dei namar kam shym la treikam ka hukum ban pynïaid ‘odd bad even’ ne ban ïaid pud sngi ïa ki taksi ban rung sha Khyndai Lad bad Motphran kumba la pynmih da ka shlem treikam Deputy Commissioner, East Khasi Hills District.
Ha kane ka jingkhynra ïa ki kot ki sla ki pulit ki la lap bun tylli na ki taksi ki bym biang ïa ki kot ki sla bad shah daiñ kuna T.1000.
Haba ïakren bad ki nongñiah taksi ki la pynpaw ïa ka jingkmen lada ki pulit ki khynra kot kali khnang ba kito ki bym pat siew khajna kin hap siew noh. Pynban ha kawei ka liang ki kyntait ban ïaid ‘odd bad even’ namar kane kan ktah ïa ka kamai kajih.
Nalor kane, ki la ong ruh kane ka jingkhynra ïa ki kot ki sla kan pynduna ïa ka jingdheng kali namar ki bun palat ki kali kiba shu thied tuh ïa ki stiker bad ki don ki kali ki bym don kot don sla kiba shu kamai.
Nalorkata, ki la ai khublei ïa ka Deputy Commissioner, East Khasi Hills District kaba la shim ïa kane ka sien jam khnang ba kito ki bym pat siew ka khajna kaba don haduh phra tylli kin ïoh ban siew noh.
Ki la ong ruh ba na ka khajna jong ki local taxi ka la ïarap bha ïa ka sorkar namar ha ka shisnem kawei ka kali kam duna ïa ka T.30,000.
Shuh shuh ki la pynpaw ba kin nym pdiang ban pyntreikam ïa ka ‘odd bad even’ ïa ki taksi namar kim lah ban pyndap shuh ïa ka ïing ka sem namar kin ïoh ban kamai tang lai sien ha ka shi taïew.
Ki nongñiah kali ki la pynpaw ba lada kito ki taksi ki bym biang kot kin nym kamai, tang katta ka Shillong ka la kylluid bad ym donkam shuh ban pynïaid ‘odd bad even’.
