Shillong, Jylliew 15:
Ki pulit ka Anti Narcotics Task Force (ANTF), East Jaiñtia Hills ha ka Sngi Palei ki la ïoh ban kem noh ïa uwei u nongkhaïi drok na jylla Manipur bad na ka met jong utei u briew la ïoh ban kurup ïa u drok heroin.
Katkum u kyrwoh khubor na u Superintendent of Police ka East Jaiñtia Hills District u Jagpal Singh Dhanao, la ong ba une u nongkhaïi drok u dei uba la tip kyrteng u Shokhothang Touthang ba la 41 snem ka rta. La ïoh kem ïa utei u briew na Nongsning ha ka jingtalasi kali ha BMS Fuel Station.
La ong ruh ba na ka liang ki pulit ka ANTF ki la ïoh ban kurup ïa u drok ba khia haduh 278.03 gram ïa uba la thep bad buhrieh bha ha ki 26 tylli ki synduk sabon.
Katkum ka jingïathuh jong u SP ka District, u Touthang u dei uba wan na Aizawl bad u don jingthmu ban wan rah drok sha Shillong.
Ha kawei pat ka jingjia, ki pulit ka East Jaiñtia Hills ki la ïoh ban kem sa ïa uwei u nongkhaïi drok ba la tip kyrteng kum u Sujit Paul. Na une u briew la ïoh ban kurup ïa u drok ba khia haduh 353.34 gram ba la thep ha ki 33 tylli ki synduk sabon. Une u dei uba na Karimganj, Assam.
Ïa une u briew la ïoh ban kem na kawei ka kali Mahindra Scorpio MZ01-D-6525 ha kaba u la phla ruh ba u don jingthmu ban pynpoi ïa une u drok sha Shillong.
Ki pulit ki la pynrung da ka ‘case’ pyrshah ïa kitei ki nongkhaïi drok ha thanat Khliehriat bad ka jingtohkit mynta ka la ïaid shakhmat ban lap ïa kiwei pat ki briew kiba ju ïa pynïaid ïew lang ïa u drok lem bad kine ar ngut.
Katkum ka jingpathai khubor jong u Myntri Rangbah, Conrad K Sangma, lyngba ka rynsan Twitter, la ong ba ka jingshongdor jong kitei ki drok ba la kurup mynta ka sngi ka long kumba T. 4 klur eiei.
