Shillong, Jylliew 15:
Ha ka miet jong ka 14 bad 15 tarik Jylliew, ki runar ki la leit ban pynpra ïa lai tylli ki ATM kiba don ha ka thaiñ Madanrting, Shillong da ka jingthmu ban lute pisa.
Ha kawei pat ka jingjia, u Carlos Salgita M Marak u la ujor ba ha ka por 2:50 mynstep jong ka 14 tarik Jylliew, ki runar ki la leit rung sha ka dukan kyiad (Wine Store) jong u kaba don ha Hawakhana, Tura, bad ki la tuh ïa ka pisa kaba don T. 5,70,000.
Ka Kong Borolin Khongshei ka la ujor ba ha janmiet jong ka 13 tarik Jylliew, ki runar ki la tuh ïa ka trok jong ka kaba don ïa u nombor ML-10C-4160 na LCS Road ha Bholaganj, East Khasi Hills.
Ka Rina Hajong, Headmistress cum Secretary ka Tangabari Govt., LP School (South West Garo Hills), ka la ujor ba ha ka 11 tarik Jylliew, ki runar ki la tuh saw tylli ki Solar Battery ryngkat ki Cable na ka skul.
