Shillong, Jylliew 15:
U Myntri ka tnat Social Welfare ka jylla, Bah Paul Lyngdoh u la pyntip ba ka Sorkar Jylla ka la mang haduh T.10 klur ha ka shi snem ban ïakhun pyrshah ïa ka jingkynrei jong u drok hapoh ka jylla bad kane ka long lyngba ki lynti bapher bapher.
Haba kren sha ki lad pathai khubor hadien ba la wai ka jingïalang bad ki nongïalam niam na ki Balang bapher bapher ba la pynlong ha ka sngi Palei ha kamra jingïalang ha Secretariat, u Bah Paul u la ong, kine ki lynti ban ïakhun kin long da kaba kynthup lang ïa ki nongshong shnong kum ki kmie ki kpa, ki khynnah skul, ki seng niam bad ruh ki seng trei mon sngewbha.
Hadien ba ka sorkar ka la dep ban ithuh ïa ki 7 tylli ki district kum ki jaka ba jur bad kynrei bha u drok, u Bah Paul u la ong, kane ka jingmang pisa kan long na ka bynta kine ki district. “Nyngkong eh ngi la phai khmat sha ki seng niam namar ki don ïa ki jingdonkam ne ki jaka ba biang bad kumta ngi la bthah ïa ki ba kin wanrah shakhmat ki jingtyrwa khnang ba yn lah ban sdang noh mardor ïa kane ka projek,” la ong u Myntri.
U la pyntip ruh ba ïa kane ka pisa yn sa ai sha baroh ki district, ki seng trei mon sngewbha bad kiwei kiwei kiba la biang bad long kiba bit ban ïakhun ïa ka jingkynrei jong u drok hapoh ka jylla.
Haba kylli pat halor ka lynti ba la shim da ka Sorkar ban peit ba ka jingpynlut ïa ka pisa kan long ha ka rukom kaba khuid, u Myntri u la ong ba ka tnat ka la don la ka bynta kumno ban peit ïa ka rukom pynïaid bad pyndonkam ïa ka pisa.
“Ngi don ïa u mission director, ki development associates ki ban dei na ka tnat planning. Baroh ki jingpynlut kin long haba shit haba shai,” u la ong.
Ha kajuh ka por u Myntri u la pyntip ruh ba kine ki nongïalam niam kin sa shong jingïalang ha ka 19 tarik mynta u bnai. Hadien kata kin sa wan biang sha ka sorkar ha ryngkat ki jingai jingmut kumno ban pynïaid shakhmat ïa kane ka projek.
Haba kylli pat halor ki bynta jong ki Balang ha ka ban rad dyngkhong ïa ka jingkynrei jong u drok, u Bah Paul u la ong ba ki seng niam ki don ka bynta kaba khraw hapoh ka jylla, bad kumta “Lada ngi sdang ban ai jinghikai haba paw halor ka jingkyrni ïa u drok, bad kumno ba kum ki nongshong shnong ba don jingkitkhlieh ngin sdang ban trei ban rat dyngkhong ïa kane ka jingeh, kan long shisha ka lynti kaba biang tam na ka bynta ka lawei jong ka Meghalaya.”
