Mawkyrwat, Jylliew 15:
Ka jingjur palat jong u slap ha kine ki khyndiat sngi ha ka thaiñ South West Khasi Hills District ka la pynlong ïa ka khyndew ba kan shong synjor bad don ka jingtwa khyndew bad twa surok ha man la ki jaka jong ka distrik.
Hynne ka step ka 15 tarik ha ka por kumba 7 baje eiei ka la don ka jingtwa khyndew haneng ka Riat Mawniuh, ka lynti ban leit sha Balat bad Ranikor. Ha kane ka jingjia ka la don ruh ka jingsahkut ki kali shipor namar ka jingkhang lynti ki maw kiba heh.
Nangta ruh la ïathuh ba katkum ki tyllong khubor ba la ïoh lum la ïathuh ka la don kawei ka jingtwa khyndew ha ka surok ban leit sha ka shnong Kensimphlang bad kumba long mynta ki kali kim lah shuh ban ïaid na kane ka lynti.
Kumta na ka liang u Deputy Commissioner (DC), South West Khasi Hills, Bah T Lyngwa ha kajuh ka por uba long ruh u Chairman ka Disaster Management Authority jong ka distrik u la buh lypa ka jingmaham ïa ki nongshong shnong ba kin long kiba husiar ha kine ki sngi na ka jinglah ban ther jong u ’lap bah ba jur.
U la buh lypa kane ka jingkyntu hadien ka jingïoh jingtip na ka Indian Meteorological Department ba kan don ka jingjur u slap u ban neh haduh ka 18 tarik mynta u bnai.
Nalor kata, u DC u la maham ïa ki nongshong shnong kiba shong ba sah ha shi lynter ki rud wah bad ki shnat wah kiba don ha South West Khasi Hills District kum ka Wah Rilang, Wah Umngi bad kiwei kiwei ba ki dei ban long kiba husiar bad lada don kino kino ki jingjia ba kin pyntip sha kine ki phone number, District Control Room , 7005602113, Police Control Room, 9615716153, Ranikor Block Control Room, 9612946561, Mawkyrwat Block Control Room, 9378185399, PWD Ranikor, 8837035641, PWD Nonghyllam, 9436913436, PWD Mawkyrwat, 9863027838, PWD Mawsaw, 9366722556.
