Shillong, Jylliew 15:
Ka tnat pule puthi ka sorkar jylla ha ka Sngi Palei ka la pyntip ba yn dang ailad biang ïa kito ki samla kiba khlem ïoh ban thoh ïa ka eksamin CUET 2023 na ka daw jong ka jingdon ki jaka thoh eksamin shabar ka jylla.
Ha u kyrwoh khubor, ka Joint Secretary ka tnat Education, ka Kong D Lyngdoh, ka la pyntip ba ka sorkar jylla ka la ïakren bad ka tnat pule puthi jong ka Sorkar Pdeng bad kumjuh ruh bad ka National Testing Agency halor katei ka eksamin.
Lah ban kdew ba ka la mih ka kynrum-kynram hadien ba ki samla kiba na kane ka jylla ki la ngat ban leit thoh eksamin shabar ka jylla kum sha Jharkhand bad kiwei.
Ka Kong Lyngdoh ka la ong ba hadien ka jingïakren bad ka tnat pule puthi ka Sorkar Pdeng lem bad ka NTA, la rai ban ailad ïa kito ki samla pule kiba la duh thoh ïa ka eksamin CUET ha kine ki sngi na ka daw jong ka jingbuh ïa ki jaka thoh eksamin shaduh shabar jong ka jylla.
