Nongstoiñ, Jylliew 16:
Ka jinghiar kynsan jong ka ïew die soh bad ka jingkyntait jong kiba bun ban thied ïa ki soh na ki nongdie soh ha Ïew Nongstoiñ bad ha sor Nongstoiñ kumjuh namar ka jingshim kabu jong ki nongwan pynpoi soh kiba ju pynpoi sha ki nongdie soh ha kane ka ïew da kaba leit die noh da ma ki ha ka dor kaba tad ka la wanrah ka jingeh ïa ki nongdie soh ha Ïew Nongstoiñ.
Halor kane ka bynta, ka synjuk ki nongdie soh ka Ïew Nongstoiñ ryngkat ka Ri-Khasi Sepngi Federation ha ka Sngi Thohdieng ka la pynlong ïa ka jingïalang ban ïakren halor katei ka kam kaba la pynlong ha Hall ka shlem treikam u Syiem ka Hima Nongstoiñ.
Ki nongkitkam ka Ri-Khasi Sepngi Federation bad ki nongdie soh ki la ong ba katei ka jingïalang da kawei ka jingmut ka la shim ïa ka rai ba ïa ki nongdie soh lane ki nongpynpoi soh ha Ïew Nongstoiñ kiba wan nabar ym shym la khang ïa ki. Hynrei nyngkong eh, shuwa ba kin wan sha Nongstoiñ, ki dei ban tip shuwa ïa ka shnong, kaba ar ki dei ban pyntip sha ka seng ki die soh bad kumjuh haba ki die ïa u soh sha ki paidbah kin sngewbha ba kin die ha ka dor kaba long kajuh ïa kaba ka seng ka buh.
Ka jingmih jong kiba nabar ban die tad ïa u soh ha Ïew Nongstoiñ ka pynhiar noh ïa ka ïew jong ki nongdie soh. Kane ka pynlong ba kim lah ban die ïa u soh namar teng-teng ki die ha ka dor kyllum kumba ki ïadie bad ha u paidbah ruh ki ïadie kajuh ka dor bad kumta ki nongdie soh kim ïoh shuh ban die ïa u soh katkum ka dor.
Shuh shuh ki la bynrap ba la kyrpad bad kam dei shuh tang ka jingkyrpad ïa kiba nabar ba lada ki wan sha Nongstoiñ wan ban die ïa ka soh, ym shym la khang tangba haba wan, shong da ka dukan bad wat ym shong ha ki kali bad khamtam eh bad die ha kajuh ka dor kumba die ka ïew Nongstoiñ.
