Mairang, Jylliew 16:
Ha ka step phyrngab jong ka 16 tarik u Jylliew, ki runar ki bym ithuh satia ki dei kiei ki la leit ban prong tuh ïa 7 tylli ki dukan kiba don ha ka dong Ummawlien jong ka shnong Pyndengumïong, Eastern West Khasi Hills.
U General Secretary ka shnong Pyndengumïong, Bah Lambok Nongrang u la ïathuh ba katei ka jingjia ka la jia ha ka por kumba 2 baje mynstep haduh ka por 4:30 baje mynstep bad la ong ba kitei ki runar ki la rong tuh ïa ka pisa bad ïa katto-katne ki marbam jong ki dukan die marbam .
La ong ruh ba halor katei ka jingjia, ka shnong ka la pyntip noh sha ki pulit ka thanad Mairang bad na ka liang ki pulit ruh mar-mar ki la leit ha katei ka jaka ban pynlong ïa ka jingtohkit.
U Bah Nongrang u la ong ruh ba ïa kitei ki runar la ïohi ruh lyngba kawei ka CCTV jong ka dukan die rong ïa ka dur jong ki runar kiba rah ïa ki tiar tuh na kitei ki dukan.
Na ka liang ka shnong ka la kyntu ruh ïa ki trai dukan ba ki dei ban husiar bad ba kim dei shuh ban buh ïa ka pisa ha ki dukan.
Shuh shuh u la ong ba katkum ka jingïohi jong u, la ong ba kitei ki runar kim dei na kane ka shnong hynrei ki lah ban don jingïadei bad ki trai shnong – ïa kata ym pat lah ban tip hynrei ynda la lah ban kem ïa ki yn sa lah ban pynshisha kiei kiba donkti ha ka kam tuh kam thiem.
Kumta na ka liang ka shnong ka buh ïa ka jingmaham ba lada lap ïa kino-kino kiba shim kabu ha ka kam tuh kam thiem hapoh u pud u sam jong ka shnong kin ym aili bad kin hap ban ai ka jingsneng kaba tyngeh ba ma ki kin sngewthuh ba ki hap ban trei shitom ym ban shu tuh shu thiem da kaba lied lane pynpra ïa ki dukan .
