Shillong, Jylliew 16:
Ka jinghap slap kaba jur ha kine ki sngi ka la ïarap ban pynbiang ïa ka jingdonkam um ha ki jaka pynmih bording bad ki jaka rep. Hynrei na kane ka jinghap slap la sakhi ruh ïa ka jingshah ktah ha kylleng ki district ka Jylla ha kaba la jia ki jingtwa kiba la wanrah shibun ki jingjulor.
Haba kren sha ki lad pathai khubor ha ka sngi thohdieng, ka Executive Director ka State Disaster Management Authority (SDMA), ka Kong Matsiewdor War Nongbri ka la ïathuh ba ha kine ki khyndai sngi, la don ka jingjur slap bad shah ktah ruh ha ka erïong, jingtwa bad kiwei kiwei ki jingshah lynshop.
Katkum ka jingkheiñ, ka la ong ba ki don kumba 78 tylli ki shnong kiba shah ktah kynthup ruh palat 2000 ngut ki nongshong shnong, ha kaba la don ruh ka jingduh ïa ka mynsiem briew ha Ri Bhoi.
Kaba kham jur ka jingtwa ka dei ha Sonapur tunnel ha surokbah-6 ha East Jaiñtia Hills district kaba ïasoh bad kiwei ki Jylla, bad ka jingtwa ha Rngaiñ ha surok Shillong-Dawki.
Ka Kong Matsiewdor ka la ong ba naduh ka 15 tarik Jylliew ka la don ka jingmaham lypa ïa ki nongshong shnong ha baroh kawei ka Jylla ban hap u slap bajur bad kiwei kiwei ki jinglynshop kiba lah ban jia namar ka jingjur slap.
Haba kylli halor ka jinglong jingman jong ki jaka ba lah ban kynrei ka jingtwa, ka Kong Matsiewdor ka la ïathuh ba na ka liang ka Sorkar Jylla ka la ïakren sani bad ka Geological Survey of India (GSI) na ka bynta ban tip ïa ka jinglong jingman ki jaka kiba don jingma khamtam kiba synjor bad lah ban jia ka jingtwa bad ïa kita ki jaka yn sa ithuh shen.
Ha kawei pat ka liang ki bor ba dei khmih ka SDMA ki la kyntu ïa ki nongshong shnong ban long kiba phikir ha kum kane ka por ba ka jinglong ka mariang kam biang. Na ka liang ka Kong Matsiewdor ruh ka la kyrpad ïa ki nongshong shnong ban pyndonkam ïa kawei ka rukom ai jingtip halor ka jinglong jingman ka suiñbneng kaba tip kum ka ‘Sachet App’.
