Shillong, Jylliew 16:
U Lat ka Jylla, u Phagu Chauhan u la ong ba ka Meghalaya ka la nang kham kiew ha kine ki 9 snem bad u la ïaroh ïa ka Sorkar Jylla ba ka la pynïaid lang ïa ki jingïohi jngai u Myntri Rangbahduh ka ri u Narendra Modi kiba dei ban pynlong ïa ka ri kaba kiew ha baroh ki liang.
U Lat u la pynpaw ïa kane haba ai jingkren ha ka jingrakhe ïa ka jingdap 9 snem ka Sorkar Pdeng kaba ïalam da u Narendra Modi kum u Myntri Rangbahduh ka ri kaba la pynlong da ka Press Information Bureau (PIB) ha Hotel Vivanta, Shillong ha ka sngi Thohdieng.
U Lat u la ong ba u snem 2023 u dei u snem ba kynjoh 9 snem ka Sorkar Pdeng bad ki lai tylli ki kyntien ‘Seva, Sushasan bad Garib Kalyan’ ki batai ïa ka jingïaid lynti ka Sorkar u Narendra Modi.
Nangta, u Lat u la ong ruh ba ka thaiñ Shatei Lam Mihngi kaba don ruh ka lariti bad ki briew kiba smat ba sting, ka nang sakhi shuh shuh ïa ki jingnang kiew naduh ki kam pynroi ha ki jingtei jingshna, bad ki jingpynïasoh kiba la nang kham biang ha kaba ka Sorkar ka la plie ïa ki lad kiba don ha kane thaiñ.
Kine ki 9 snem la aiti khnang ban wanrah ïa ka roi ka kiew kaba ïoh bynta bad kynthup lang ïa baroh bad kaba neh ha kaba ka Sorkar ka la pyndep ïa ka kular ban wanrah ka lad kaba ïaryngkat na ka bynta baroh ki nongshong shnong bad ka Sorkar ka ngeit borabor ban buh ki thong kiba eh bad ban poi sha ka thong hashwa ka por ba la buh.
Nalor kane, u Lat u la ong ïa kane la lah ban sakhi ha baroh ki tnat treikam ka Sorkar ha ka ri la ka dei ha ka por ba ai tika ïada COVID-19, ka jingkiew eh ka kam khaïi ban shalan shabar ri, ha ka liang ka jingpyndonkam ïa ki kor ki bor ha baroh kawei ka ri, ka jingsam bording bad jingsam umbam sha ki longïing.
U la ong ba ka pyrthei mynta ka la sngewthuh ba ki kam pynroi ki bym neh bad ai jingim kim dei ki kam pynroi ba shisha.
Shuh shuh u Lat u la ong ruh ba ha ka liang ka mariang, hapoh ka jingïalam u Modi, ka India ka la kut jingmut ban pynneh pynsah bad kyntiew ïa kiei kiei kiba la don naduh hyndai hynthai, ha kaba u la ai nuksa ïa ka jingpynbna ka United Nations ba ka 21 tarik Jylliew kum ka sngi kilan met ha ka pyrthei baroh kawei (International Yoga Day) kaba long ka jingithuh ïa kiei kiei kiba la leh bad bud ha India.
Ha kane ka sngi, la donlang ruh ki ophisar ba kynthup ïa ka Sherry Lalthangzo kaba dei ka Economic Adviser ka NEC, u Air Marshall SP Dharkar uba dei u Air Officer Commanding-in-Chief ka Eastern Air Command, ka Kong Patricia Mukhim kaba kren shaphang ki kam pynroi ryngkat ka jingsumar ïa ka mariang, nalor ki ophisar ka Sorkar Jylla, ka Additional Director General ka PIB, ka Jane Namchu bad kiwei kiwei.
