Shillong, Jylliew 16:
Ka Directorate of School Education & Literacy jong ka sorkar jylla ha ryngkat ka jingïatreilang bad ka National Council of Educational Research and Training, New Delhi ha ka sngi Thohdieng ka la pynlong ïa ka State Level Science, Mathematics and Environment Exhibition 2022-2023 halor ka phang “Technology & Toys”.
Ïa katei ka prokram la pynlong ha Meghalaya Bharat Scouts & Guides, State Headquarter Pine Mount Ridge kaba don ha Laban, Shillong ha kaba la ïohi ba ki khynnah skul na kylleng ki jaka jong ka jylla ki la wan ban ïashimbynta ha katei ka ïew pyninam lane ka ‘Exhibition’ bad ka la don ruh ka jingsam ïa ki khusnam sha ki khynnah skul kiba la jop ha katei ka ‘Exhibition’.
La ïohi ba ki khynnah skul ki la ïa shna bad pynwandur ïa ki jingshna saiñdur bapher bapher jong ki ha ka rukom stad saïan, teknologi, ka jingkheiñ bad ka rukom long ka sawdong sawkun.
Katkum ka jingbatai jong ki katto katne ngut ki khynnah skul kiba la ïashimbynta ha katei ka ïew pyninam la ïohi ba ki khynnah skul ka Pine Mount School, Shillong ki la shna ïa ka jingshna kaba la tip kum ka Hydrobler kaba dei ka jingshna ban ïakhun pyrshah ïa ka plastik ha ka jaka ban pyndonkam da ka plastik kaba ktah ïa ka mei mariang yn lah ban pyndonkam da katei ka jingshna.
Na ka liang u khynnah skul ka Shillong Public School u ba la shna ïa u ‘Earthquake Detector’ ne ka jingshna kaba lah ban tip hashwa ka jingwan jong u jumai.
Haba ai jingkren ha katei ka sngi kum u Kongsan, u Pravin Bakshi, IAS Commissioner & Secretary, u la ong da ka jingpynlong ïa kane ka jingpyninam na ka bynta ki khynnah skul ka la pynlong ïa ki ba kin nang kham shemphang bad ba kin dang ïoh jingnang jingtip kham bniah shuh shuh ha kaba ïadei bad ka jingstad saïan, teknologi, ka jingkheiñ bad ka juk stad mynta ha ryngkat ka jingnang ban pynneh ïa ka sawdong sawkun ka mariang.
“Ngi la sakhi ïa ki saiñdur ba ki khynnah skul ki la pynwandur bad shna da ka jingtrei shitom bad ka jingpyrkhat kumno ban pynwandur ïa ki bad kane ka jingtrei shitom ka jong ki ka la pyni shisha ïa ka dak ba kine ki khynnah ki ju khreh kot bad wad jingnang jingtip bha ha ryngkat ka jingbud thik pa thik ïa ka phang jong katei ka ïew pyninam”, la ong u Bakshi.
