Shillong, Jylliew 16:
“Ka Reservation Roster ka dei tang ban pyntikna ïa ka jingpyntrei kam ïa ka Reservation Policy, bad ka Reservation Roster kam nym dei ka rai haba ïadei bad ka jinglong kham hashwa (seniority) ha ka kam, namar ka jingithuh ïa kiba don kham hashwa ha ka kam, yn pynshong nongrim beit katkum ki kyndon kiba la don lypa.”
Kane ka dkhot ka dei ka jingbatai ha ka Office Memorandum kaba la pynmih thymmai halor ka Reservation Roster da ka Sorkar lyngba ka jingpynbna kaba pynmih ha ka 14 tarik Jylliew, 2023.
La ong ba ha man la ka wat ba la dep thungkam, dei ban buh ïa ka jingthoh (account) halor ka reservation roster kaba pynmih ïa ka bhah kaba ïoh ki jaitbynriew Khasi bad Jaiñtia, Garo, kiwei pat ST bad SC.
Halor ka jingpynkhreh ïa ka Reservation Roster, ka Office Memorandum ka la ong ba khnang ban pynkhreh ïa ka reservation roster, ki kyrteng jong baroh ki kyrtong kiba don ha ka kam bad bat ïa ki kyrdan tad haduh ka sngi ba pynmih ïa kane ka OM, da kaba sdang na kiba dang don ha ka kam katba don ka jingbuh jingthoh, hynrei ka jingpyntreikam ka dei kaba bteng shakhmat katkum ki Roster point kiba don.
“Lada kiba shah thungkam kiba dei ki Scheduled Tribe ki shah thungkam katkum ka jinglah lajong dei ban thoh UR ha ka column kaba ïahap ban buh. Lada kiba dei ki Scheduled Tribe ki shah thungkam katkum ka bhah (reservation), dei ban thoh ST ha ka column kaba ïahap bad ka long ruh kumjuh ïa kiba dei ki OST/SC lada ki shah thungkam katkum ka bhah, hap thoh OST/SC ha ka column kaba ïahap,” la batai ha ka OM.
Shuh shuh halor ka jingbuh ryntih ïa ki jingujor da ki tnat treikam ka Sorkar, ka OM ka la batai shai ba man la ka tnat ka dei ban thung da u ophisar uba la kham hashwa ha ka kam, kata, ha ka kyrdan Under Secretary shaneng ban shimti kum u/ka Grievance Redressal Officer na ka bynta kino kino ki jingpynsngew ki pynpaw ka jingbymhun halor ka rukom pyntreikam ïa ka Reservation Roster.
