Shillong, Jylliew 16:
Kum shibynta ka jingrakhe ïa ka Goa Diwas, ka seng Bharatiya Janata Party (BJP) ha ka sngi Thohdieng lyngba ka “Ek Bharat Shreshtha Bharat” ka la pynlong ïa ka prokram ka ban wanrah ïa ka jingïatylli, ka jingïadei bad ka jingïasam ïa ka lariti bad ka riti ki dustur lane ka Bonding of Culture & Tradition hapdeng ka jylla Goa bad ka jylla Meghalaya kaba la long ha ka shlem treikam jong ka seng.
Ha katei ka sngi la ïoh ïa ka jingkren plie pyrda na u Dipayan Chakraborty uba dei u State Vice- President bad Convener ka “Ek Bharat Shreshtha Bharat”, na u Sunil Deodhar uba dei u BJP National Secretary & Northeast In-Charge ka “Ek Bharat Shreshtha Bharat”, na u Nilesh Cabral uba dei u Myntri ka sorkar Goa bad na u State President, Bah Ernest Mawrie.
Haba ai jingkren ha katei ka sngi, u Nilesh Cabral kum u Myntri ka sorkar Goa u la ong ba kum ka Ri baroh kawei ka dei ban kiew bad haba ka ri ka kiew, ki paidbah ruh ki kiew lang ha ki liang baroh.
U Nilesh Cabral u la ïathuhkhana shaphang ka jylla Goa kumno ba ka kylla long ka jylla bad ki riti ki dustur kiba katei ka jylla ka bud. U la ong ba ka jylla Goa bad ka jylla Meghalaya ki dei ki jylla kiba don ïa ka jingitynnad jong ki jaka kiba pynïap biej ïa ki nongwan jngoh kai pyrthei bad kine ki artylli ki jylla ki dei ki jylla kiba ieid ia ka put ka tem bad ki paidbah jong kine ki artylli ki jylla ki dei ki briew kiba bha.
U Nilesh u la ong ba ka jylla ka ju ong ba ka Meghalaya ka don kumba 76% ki briew kiba dei ki Khristan, hynrei u la ong ba ka jylla Goa ruh ka don shibun ngut ki paid Khristan kiba don hapoh katei ka jylla.
“U Myntri Rangbahduh ka Ri, u Narendra Modi u la wanrah thymmai ïa kane ka jingpyrkhat kaba long ban shna na India, ba la shna da ka India bad ba la shna na ka bynta ka India baroh kawei bad kane ka dei kaei kaba ka Ri ka dei ban long. Kane ka Ri ka dei ban kyrshan iwei ïa iwei bad haba kane ka Ri ka kyrshan iwei ïa iwei, kan nym slem shuh ba hapoh 20-25 snem eiei, ngin sa kiew ha ka liang ka pisa ka tyngka bad ki ban ïoh jingmyntoi bad kiew lyngba kane kin dei ki khynnah samla kiba dei ki lawei jong ka Ri”, la ong u Nilesh Cabral.
U la ong ba u la ïoh jingtip ba ki riewngeit khristan napoh kane ka jylla kim da ai than ka jingïadei bad ka BJP bad u la ong ba um tip na ka daw aiu kaba la pynlong ïa ki paidbah ba kin sngew kumne hynrei u la ong ba hapoh Goa ha ka sien ba nyngkong ba ka BJP ka la wan ha ka bor, ki paidbah ka jylla Goa ruh ki ju don kum kane ka jingpyrkhat ba katei ka seng kan pynkut noh bad pynkylla ïa ka jinglong Khristan jong ki hynrei ha ka jingshisha kum katei ka jingjia ka khlem wan jia satia ïa ki para bad ki hymmen kiba dei ki Khristan.
Na ka liang u Bah Ernest Mawrie u la ong ba kane ka sngi ka long ka sngi kaba kmen ba ka seng ka la ïoh ban pynlong ïa ka Goa Diwas bad ban ïasam ïa ka jingïadei hapdeng ka jylla Meghalaya bad ka jylla Goa.
“Ngi kwah ban don ryngkat bad ki briew napoh Goa hynrei hangne hapoh ka jylla la jong ngi, ki don tang khyndiat ngut ki nongbylla kiba shong ba sah watla kata ruh ngi la pyrshang ban khot ïa ki sha kne ka jingïakynduh lang hynrei ki don napdeng jong ki kiba khlem ïoh wan”, la ong u Bah Ernest.
U Bah Ernest u la ong ruh ba kum u Khristan na ka Balang Katholik kam ju don satia ka jingleh shiliang khmat ïa u haba u don hapoh ka seng bad leit sha Delhi. Hynrei baroh ki nongïalam jong ka seng naduh u President rangbah ka seng, u JP Nada bad kiwei ki nongïalam ki la pdiang sngewbha ïa u bad kim ju don kata ka jingpeit shiliang khmat ïa u tang namar ba u dei u Khristan.
U la ong ba lyngba katei ka jingïakynduh lang ha katei ka sngi kam dei ban don ka jingkut hynrei ban bteng ban wanrah ïa kata ka jingïatylli bad ka jingieid ïa ka ri, ka ñiam bad ïa ka riti ka dustur.
