Shillong, Jylliew 16:
Ka jingïoh kem ki pulit ka East Khasi Hills ïa arngut ki nongkhaïi drok ha ka janmiet jong ka 15 tarik Jylliew, 2023 na Nongshiliang, Shillong, ka la ïalam ïa ki ban ïoh kurup pat sa ïa ka pistol, kuli, bad san tylli ki kali na uwei na kine ki nongkhaïi drok nalor kiwei pat.
U SP ka East Khasi Hills, Bah Sylvester Nongtnger, ha ka Sngi Thohdieng u la pyntip ba ki pulit ka ANTF ryngkat ki pulit na thanat Rynjah bad Laitumkhrah, ki la ïoh kem ïa arngut ki nongkhaïi drok ba la tip kyrteng kum u Eldikinstar Sohtun bad u T. James Seiminthang ha ka 15 tarik Jylliew na Nongshiliang.
Na kine ki arngut, la ïoh kurup 40 tylli ki synduk sabon ba la thep da u drok Heroin bad uba khia 423.09 Gram. Na ka liang u Myntri Rangbah, Conrad K Sangma, u la pynbna lyngba ka rynsan ‘Twitter’ ba ka jingshongdor jong une u drok ba la ïoh kurup ka long kumba T. 3 klur.
Ha kaba ïadei bad katei ka jingïoh kem, ki pulit ki la pynrung da ka jingujor ha thanat Rynjah hapoh ki kyndon ka NDPS Act bad ka jingtohkit ka la ïaid. Nalor u drok, ki pulit ki la kurup ïa artylli ki Mobile Phone, kawei ka thuk-thuk (ML 05 R 5271), bad mar kawei ka PAN Card bad ka EPIC.
Hynrei u SP u la ïathuh ba hadien ka jingtohkit ïa kitei ki arngut, ki pulit ha ka step jong ka Sngi Thohdieng ki la leit ban khynra ïa ka ïing sah jong u Eldikinstar Sohtun kaba don ha Mawpat.
Ha kane ka jingkhynra, la lap ïa kawei ka pistol ‘revolver’, hynñiew tylli ki kuli 0.22, hynriew tylli ki kuli .38, uwei u kuli ba la dep pyndonkam, san tylli ki kuli 12 Bore, kawei ka Mobile Phone, ka pisa T. 2 lak, kawei ka Air Gun, ar tylli ki kali Mahindra Thar, bad mar kawei ka kali Maruti Zen, Maruti 800 bad Chevrolet Beat.
